4346/2025-2026

Saitual, the 9th February, 2026: Vawiin khan District Level Committee on Fire Prevention (DLCFP), Saitual District buatsaihin Fire Prevention Week (Kangmei Ven Hapta) 2026 hawnna hun chu DC Conference Hall, Saitualah hman a ni a, Pu Tharun Patnaik, SDO (S) chu khuallian niin hun a hmanpui.

He hunah hian khuallian Pu Tharun Patnaik SDO (S) chuan thu a sawi a, kumin Kangmei ven hapta thupui, "Nungchate chenna leh tui thianghlim min petu ramngaw kangmei lakah venghim rawh" tih thupui chu a sawifiah a, tui thianghlim mipuiten kan neih theih nan leh nungchate kan humhalh theih nan kangmei venhim kawngah hma lak a pawimawh thu a sawi.

VC te chu Sawrkarin lo hal theih hun a bithliah March ni 15 thleng tih chu ngai pawimawh tur leh mipuite pawh hrilh hre tha turin a chah a, kangmei ven kawnga hma la tha ber khua te pawh lawmman an pek tur thu a sawi. Khuallian chuan kangmei ven kawngah DC Office leh Forest department chu theih tawp chhuah an inhuam thu a sawi a, khawtlang hruaitute nen thawhhona tha tak neih a beisei thu a sawi bawk.

Kangmei Ven Hapta 2026 hawnna hi Pu Andrew Lalthlamuana, ACF, DLCFP Member Secretary chuan a kai hruai a, kum hmasa lama Saitual District-a kangmei ven a nih dan report pein, District Level Committee on Fire Prevention, Saitual District-in kumina hmalak dan tur an rel hrang hrang te a tarlang nghal a ni. Thusawi hi khuallian Pu Tharun Patnaik, SDO ( S), Pu R. Lalruatkima, President, Sub-Hqrs, YMA leh Pu J. Thangzuala, President, Joint VC hnen atangin ngaihthlak a ni. Pu J. Thangzuala kaihhruainain kalkhawmte chuan Fire Prevention Week 2026 thutiam (Pledge) an sawi rual bawk a ni.

He hun hi Pu HP Lalbiaktluanga, RO chuan lawmthu sawinain a khar a ni. Vawiin hun hmannaah hian DLFPC member te, sawrkar department hotute, khawtlang hruaitute leh tlawmngai pawl aiawhte an tel a ni.

Kangmei Ven Hapta 2026 hi February ni 9 atanga ni 13 thleng neih tura rua hman a ni a, kangmei venhim kawnga hma la tha zual pathum te chu lawmman pek an ni ang a, khaw pathum te consolation prize pek an ni bawk ang. Huan/ leipui tur mimal rama vat te chuan March ni 5 hmain an hal tur a ni a, khawtlang theh ram neitute chuan March ni 15 hmain an lo te chu an hal tur a ni. Saitual District chhunga lo/ huan/ leipui hal tur reng rengin an hal hma ni thumah VC hnenah an hriattir tur a ni.