4347/2025-2026

Dated:Mamit the 9th of February, 2026 : Vawiin khan Multi State Level Mock Exercise on Earthquake Disaster chu Mamit District Disaster Management Authority huaihawtin, Hospital New Building leh Mamit Bazar vengah te neih a ni. Lirnghing thlen thulha chetlak dan tur nunchan zirna neihah hian lirnghing avanga chhiatna thleng hrang hrang kangmei chhuak leh hliam leh thite buaipuina hna thawh dan turah nunchan zirna hi kalpui a ni.

Vawiin lirnghing avanga chhiatna thleng nunchan zirnaah hian chhiatna thlenna hmunah hian Staging Area siam niin, hliam leh mitthite Medical Team-te leh chhanchhuahna hna thawktute'n rang takin an buaipui nghal a. Hliam na zualte leh mitthi te hi Mamit District Hospital rang taka panpui nghal an ni.

Chhiatna thlen thulha chetlak dan tur zirnaah hian chhanchhuahna hna hi SDRF, 4th IR Bn. Mamit College NCC leh St. Francis Of Assisi School NCC bakah Quick Response Team te chuan a hmunah hian an thawk a, chhiatna thlenna hmunah Staging Area siam a nih bakah Relief Camp siam a ni bawk a ni.

Vawiin lirnghing tawh thulha nunchan zirnaah hian NDMA chuan Mamit a Chief Observer atan Pu Abhijit Phukan, Inspector, CISF ăn ruat a, hemi bakah Mamit DDMA in Commandent 4th IR leh SP Mamit te an ruat bawk. Incident Commander hi Pi Lalchhandami, SDC, Mamit leh Pu Lalawmpuia, SDC, Mamit te an ni.

Vawiin Multi State Level Mock exercise on Earthquake Disaster hi Pu Lalnunfela Chawngthu, SDO (S) chuan Incident Command Post atangin a vil a, Hospital New Building leh Bazar venga chhiatna thlen thulha chetlak dan kalpui lai hi ramchhung hmun dangte nen live stream hmanga kalpui a ni bawk.