4348/2025-2026

Dated Serchhip, the 9th February, 2026: Vawiin khan Serchhip DC Pu Paul L Khuma hoin Serchhip DC Meeting Hall ah kumin State Day of Prayer hman dan tur chungchang thuneituten an rel.

State puitlinga Mizoram hlan kai ni Mizoram State Day - February ni 20 chu Mizoram tana tawngtai rualna ni State Day of Prayer atan hman thin a ni a. Kuminah pawh hian Mizoram State Day of Prayer Committee in ruahmanna a siam angin Mizoram chhung hmun hrang hrangah hman a ni leh dawn a. Serchhip District a hman dan tur relin vawiin hian thutkhawm pawimawh neih a ni a. State Day of Prayer (SDP) member, Aizawl atanga lo kal ten he hun hi an hmanpui a. Serchhip District chhunga tlawmngai pawl hrang hrang hruaitute bakah kohhran hruaitute an tel a ni.

Serchhip District ah chuan a hmanna pui ber hi Serchhip khawpuiah neih ni se, District chhung khaw tinah he mi ni hian kohhran zing tawngtai inkhawm thupuia telh theuh tura ngen ni se, tiin an rel a. A hmanna programme duang tur leh kengkawh turin Working Committee vawiin meeting-ah hian din a ni a. Kohhran hruaitute kaihhruaina hnuaiah pawl hrang hrang leh Serchhip District Administration kengkawhtu official te he Committee member tur hian ruat an ni.

Nasha Mukt Bharat Abhiyan (NMBA) Serchhip kaltlangin District pum huap Camping neih mek a nih avangin he camping-a Tawngtai Pawl te nen tanghoin, State Day of Prayer pawh hi anni nena inthuruala hun hman dan zawn ni se, tiin vawiin meeting chuan a rel a ni.