Nimin khan Fire Prevention Week 2017 chu Lawngtlai DC Conference Hall-ah LADC Chief Executive Member Pu VL Hmuaka'n a hawng.

Khuallian Pu VL Hmuaka chuan nunna atana kan mamawh boruak thianghlim hip tur min petu thing leh mau te kangmei leh thil dang hmanga kan tihchereu nasat avangin khuarel chhiatna a thlen nasat phah thu a sawi a. Kum tin rama kangmei chhuakin kan ram rohlu thing leh mau leh ramhmul hlu tak tak a kang ral thin tih sawiin, chumi ven chu khua leh tui thate'n kan tih tur a ni, a ti a. Fire Prevention Week hman thin chu a hlawhtling thawkhat a, puitlingte chuan kangmei ven pawimawhzia kan hre tlangpui tawh a, chutih rual chuan zirlai naupangte hi zirtir leh hrilh hriat an la ngai nasa hle a ni tiin, kangmei veng tura mahni ngei thawk tur leh mi dangte zirtir chhawng zel turin kal khawmte a sawm nghal a ni.

Khual zahawm, Lawngtlai DC mawhphurhna la mektu Pu H.Dolianbuaia MCS chuan Fire Prevention Week hmanin a tum ber chu a Week hman satliah mai ni lovin, thal chhung kum tluana kangmei ven zawk a ni, a ti a. Thing leh mau a chereu chuan tuihna a kang a, ramsate pawh an chereu ve nghal thin tiin, ram nuam tak nei tur chuan ramngaw tichereu thei kangmei chhuah loh leh ven ngun a pawimawh a ni, a ti. DC chuan Lawngtlai District chu ram tikang lo leh kangmei veng tha ber district a nih leh ngei theih nana tan la turin kal khawmte a sawm nghal bawk.

He Week hawnna hi Deputy Conservator of Forest (WL) Pu PC Lalchhandama'n a kaihruai a. Thu sawi bakah hian zaithiam zai te ngaihthlak niin, LADC-a Conservator of Forest Pu K.Lalromawia'n lawm thu sawiin hun a khar a ni.

Nimina Fire Prevention Week hawnnaah hian LADC-a EM leh MDC te, sawrkar department hrang hranga officer te, VC leh tlawmngai pawl lam te, thu thar theh darhtu leh zirlai naupangte an tel.

Attachment

  • Loading attachment...