Vawiin khan Road Safety Week 2017 chu Lawngtlai DC Conference Hall-ah Lawngtlai DC Pu H.Dolianbuaia MCS chuan a hawng.

Pu H.Dolianbuaia chuan fimkhur tawk lohna avangin zinkawngah leh hmun dangah lirthei chunga chetsualna a thleng thin a, chumi veng tur chuan fimkhur taka lirthei khalh a tul a ni, a ti a. Driver-te hi ram hmelhmang pho langtu an ni a, driver fel chuan khualzinte hmuhah ram a chawimawi thin tiin, driver-te chu hawihhawm tak leh nun uluk tak chunga lirthei khalh thin turin a chah. Kan hna thawh ni lovin, kan thawh dan zawk hi kan zahawmna kengtu a nih avangin lirthei khalh hna chu hna zahawm taka chhuah turin driver-te an pawimawh a ni, a ti bawk.

Road Safety Week hawnna hi District Council Transport Officer Pu F.Lalhmachhuana'n a kaihruai a. Resource person pathum awmin, MVI Pu Joseph Lalthansanga Pachuau chuan MV Acts & Rules chungchang a sawi a; SDPO Pu Saidingliana Sailo chuan driving manner & etiquette chungchang sawiin, District Hospital-a MO Dr Lalmalsawma'n first aid chungchang a zirtir a. DIPRO Pu C.Lalhruaitluanga'n lawm thu sawiin hun a khar a ni.

Week hawnnaah hian Lawngtlai District Road Safety Committee member te, traffic leh enforcement lam te, motor neitu leh driver te an tel.

Road Safety Week hi February ni 6-12 chhung hian hman tur a ni a. Hemi chhung hian thuneitu (traffic leh enforcement) lamin uluk takin special drive beihpui an thlak dawn a. Week denchhen hian driver țha ber, traffic police țha ber leh motor fai ber te thlan chhuah leh tur niin, he'ng thlan chhuahte hi Week kharna hun, February ni 13-a Areopagy-a hman turah lawmman hlan an ni ang.