1938/2026-2027

Lawngtlai, 25th August, 2026 : Vawiin chawhnu dar 1:00 PM khan DC Conference Hall- ah Bawrhsap Pu Donny Lalruatsanga kaihhruaiin FOCUS 2.0 (Fostering Climate Resilient Upland Farming Systems in the North East) Lawngtlai District - a kalpui dan  tur chungchangah thutkhawm neih a ni.

Pu Donny Lalruatsanga chuan kalkhawmte hnena  lawmthu sawiin, FOCUS 2.0 hian Mizoram district zawng zawngte huamin, khaw-  700 leh chhungkaw - 75,000 vel a huam dawn a ni, a ti. FOCUS 2.0 chu  kum 6 chhung (2025 -2026 aṭanga 2031-2032) kalpui tur niin, Mizoram sawrkara Agriculture & Farmers Welfare Department hnuaia Society for Climate Resilient Agriculture in Mizoram (SCRAM) chu Lead Implementing Agency an nih tur thu a sawi a. A tum ber chu Kut hnathawktute tanpui, thlai thar hralh dan tur ngaihtuah leh ei leh bara intodelhna tura hmalak bakah tlangram lo neih thin  tih tlemna tur a ni, a ti. Bawrhsap chuan Line department-te nen thawhho tur a nih angin  ruahmanna tha  siam thiam a tul hle tiin, Focus 2.0 zirchiang leh theihtawp chhuah turin a chah nghal  a ni.

Thutkhawmah hian FOCUS 2.0 kalpui  dan tur leh DPIO Office- hawng tura hmalakna tur thlirhona leh sawihona neih a ni a. Lawngtlai District-a line department- zawng zawngte theihtawp chhuahho ni se an ti a. Focus 2.0 tha taka kalpui a nih theih nan 'Annual Plan' siam hmain Line department - te chu an  hlawhtlinpui theih tur 'Project' lo siam se tih niin, Bank lam te pawh 'convergence' a kalpui theih awm ang ang te  lo zirchiang se tih a ni bawk.

Vawiin thutkhawm ah hian FOCUS 2.0 Lawngtlai District Member-te an tel tha hle a, Bawrhsap chuan lawmthu sawiin thutkhawm hi a khar.