1937/2026-2027

Lunglei, 2026 Thlazing ni 25: Vawiin khan Lunglei District Level Committee on Teachers' Day Celebration chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a. September ni 5, 2026 (Inrinni)-a 'Zirtirtute Ni' (Teachers’ Day) lo thleng tur atana inbuatsaihna leh a lawm dan tur an sawi ho.

Bawrhsap Pi Navneet Mann chuan zirtirtu hna chu hna zahawm leh pawimawh tak a nih thu leh zirtirtute chuan chawimawi an phu thu sawiin, kumin Zirtirtute Ni pawh urhsun taka hman ni se a duh thu a sawi a. Mipuite chu zirtirtute hlutna hre thar a, anmahni chawimawi tura chahin, zirtirtute pawh chawimawi tlak leh zah tlak a, rinawm taka an hna thawk zel turin a chah.

Lunglei District Education Officer Pu Micky R. Lalenkawla'n kum hmasa lama Teachers' Day hman dan leh kum 2026 atana ruahmannate a tar lang a. Kumina Teachers' Day hman dan tur rawtna hrang hrang sawi ho zui a ni.

Teachers' Day ni tak, September ni 5 chu kumin hian Inrinni a nih avangin leh September ni 4 chu sawrkar chawlh a nih bawk avangin, Teachers' Day lawmna hrang hrang chu September ni 3 (Ningani)-ah buatsaih ni se, tih a ni a. District pum huapa a huhova Zirtirtute Ni lawmna a hranpaa buatsaih lovin, Lunglei District chhunga zirna in hrang hrang chuan anmahni remchan dan angin anmahni sikul ṭheuhvah Zirtirtute Ni pualin hun hmang se tih a ni a. Sawrkar office hrang hrangte pawh September ni 3 chawhma dar 11:00-ah an office-ah zirtirtute hlutna leh pawimawhna inhriat thartirna, "Re-affirmation in honour of teachers" hun buatsaih tura ngen ni se, tih a ni.

Kumin Zirtirtute Ni pual hian Lunglei khawpui chhung hmun langsar leh remchang lai hmun kuaah Deputy Commissioner Office, District Education Office, District Project Office (Samagra Shiksha), Sub-Divisional Education Office (North), Sub-Divisional Education Office (South), Mizo Zirlai Pawl Headquarters Lunglei leh Mizo Students' Union (MSU) Regional Headquarters Lunglei te'n thuziak (banner) tar tura ruahman niin, sikul leh college te chu an remchan dana zirtirtute chawimawina thuziak (street poster) tar tura ngen ni se, tih a ni bawk a. Zirtirtute Ni puala Lunglei Bawrhsap Pi Navneet Mann thuchah chu local cable TV leh social media kal tlanga tihchhuah turin ruahman ni se, tih a ni bawk.

State Level Working Committee-in a lo ruahman angin kumin hian zirtirtu damlo leh harsatna tawkte chhawmdawlna atana hman tur National Foundation for Teachers' Welfare (NFTW) Fund atana zirtirtute'n sum an thawh tur zat chu ₹300 tuk niin, hei hi sawrkar leh private sikul zirtirtute pawhin an zawm theih vek thu leh hemia pawisa thawhte chuan chhawmdawlna an dil theih vek thu sawi lan a ni a. NFTW atan hian kum danga tih ṭhin token/car flag, keychain leh pen ang chi hmanga sum tuak chu kumin chuan tih loh turin State Level NTFW Committee chuan a rel a. Hemi atana zirlaite hnen aṭanga pawisa khawn/thawhtir pawh tih loh tur a nih thu ṭhut khawmah hian sawi lan a ni.

National Teachers Award 2026 dawng tura thlan, Pi Lalnunmawii, Headmistress, Government Electric Veng High School, Lunglei leh Mizoram State Award for Meritorious and Outstanding Teachers 2026 dawngtu, Pu C. Lalhmingmuana, Principal, Baptist Higher Secondary School, Serkawn, Lunglei te chu Lunglei District Level Committee chuan chhuanawm a tih thu leh a lawmpui tak zet thu he ṭhut khawmah hian sawi lan a ni bawk.

Nikum 2025 khan NFTW Fund atan zirtirtute'n ₹300 zel thawhin, Lunglei District chhunga zirtirtute thawh khawm aṭangin cheng nuai 4.41 (₹4,41,000) hmuh a ni a. Lunglei District chhunga zirtirtu 22 chuan nikum khan NFTW Fund aṭangin damlo kanna/chhawmdawlna dawngin, hemi atan hian a vaiin cheng nuai 3.8 (₹3,80,000) sem chhuah a ni.