No.3148/2021-2022
Aizawl Sahmulphah thla ni 25, 2021: Vawiin khan Lawngtlai DC Conference Hall-ah Lawngtlaia ei leh in siam leh zuartute tan ei leh in thianghlim leh himna (food safety) chungchang zir hona buatsaih a ni.

He huna Khuallian Lawngtlai Bawrhsap Dr Andrew H. Vanlaldika chuan mihringin tha taka hna thawk turin hriselna tha a mamawh a, chumi tur chuan ei in thianghlim leh tha a pawimawh tih a sawi a. Mihring hriselna leh nunna thlenga nghawng thei a nih avangin ei leh inah fimkhur a, thianghlim taka chet a tul a ni tiin, ei siam leh zuar kal khawmte chu food safety ngai pawimawh turin a chah a ni.

He zir hona hi Lawngtlai Chief Medical Officer Dr LP Malsawma'n a kaihruai a. Directorate of Health Services, Aizawl atangin Joint Director (Food & Drug) Pu Lalsawma'n khuhhawnna thu a sawi a. Deputy Director (F&D) Pu F. Lalliantluanga, Food Safety Officer (F&D) Pu John Laldingliana leh Food Safety Officer (F&D) Pi Lalrinkimi Pachuau te'n food safety chungchang leh Food Safety & Standards Acts & Rules-a hriat tur pawimawhte an sawi a. Zawhna leh chhanna leh sawi hona hun hman a ni bawk.

Aizawl atanga Food Safety Team lo kalte hian Mobile Food Testing Laboratory rawn kengin, restaurant, chawhmeh bazar leh buhfai kudam-ah te food sample an endik nghal a ni.

Food Safety and Standards Act, 2006 hi India ramah mihring tana ei leh in tur tha, natna hrik laka him leh chakna pai siam chhuah leh mipui hnena pek a nih theih nana dan siam niin, August ni 5, 2011 atanga hman tan a ni a. He dan hnuaiah hian ei tur siamna, vawn thatna leh zawrhna hmun chhinchhiah (registration & licence) te, ei tur siam chhuah leh zawrhte a that leh that loh enfiah te kalpui thin a ni.

India rama ei leh in siam chhuaktu, chaw luttu leh chhawp chhuaktu zawng zawng (a siamna hmunpui, restaurant, thingpui dawr, chhang siam, catering, nepnawi zuar, dawr, rantalh, adt.) chuan Food Safety and Standards Authority of India (FSSAI) atangin phalna (registration/licence) an nei hmasa vek tur a ni a. Dan bawhchhia (registration/licence nei lova ei leh in zuar emaw, ei tur thianghlim lo leh him tawk lo zuar emaw) an awm chuan man a, hrem leh an thil siam tihchhiat theih a ni.

Registration hi tum khatah kum khat atanga kum nga chhung atan tih theih a ni a. Registration fee hi (kum khata Rs nuai 12 man hu hralh tling lo tan) kum khatah Rs 100/- zel a ni a. Sumdawnna lian deuh, kum khata Rs nuai 12 man hu hralh tling chin tan chuan licence neih a ngai a, licence fee hi kum khatah Rs 2,000/- zel a ni thung.

Lawngtlai District chhunga ei leh in zuar (Food Business Operator), registration ti tur emaw, licence dil tur emaw chuan Food and Drugs Administration Wing, CMO Office Lawngtlaiah tih tur a ni.