No.3149/2021-2022
Aizawl, the 25th November 2021 : Vawiin khan Information & Public Relations Minister Pu Lalruatkima chuan Mizoram Departmental Officers' Association (MDOA) khawmpui General Body Meeting vawi 12-na Taxation Department Auditorium, MINECO a neih chu khuallian niin a hmanpui.

Minister Pu Lalruatkima chuan MDOA member te chu Department hrang hranga hna leh mawhphurna pawimawh tak tak chelhtu an nih angin Sawrkar kut leh ke pawimawh tak an ni tiin Sawrkar ruahmanna te tihhlawhtlin kawngah leh ram leh hnam tana rohlu tling tur thil Sawrkarin a kalpui naah mawhphurna lian tak an nei tih hriaa, an thiamna, an finna leh an theihna zawng zawngin Sawrkar finchhuah thin turin a chah a. An hnathawhnaa mimal hamthatna aiin mipuite leh Sawrkar tana tha ber chu dah chungnung ber zel turin a fuih bawk. Sawrkar hnathawk nunphung leh chezia chu Sawrkar a in thlak pawhin a danglam thiang lo tiin Sawrkar fawng cheltu apiangte finchhuah leh thawhpui chu an mawhphurna a ni, a ti a. Kohhran ah emaw, NGO ah emaw pawh inhmang ila, Sawrkar hna kan eizawnna ber a ni tih hriaa engtik lai pawhin hei hi kan dah number 1 ber tur a ni, a ti.

Pu Lalruatkima chuan hresa leh thiamsa vek, tumah kan awm lova, kan hnathawhna kawngah zir tawp ni a awm lo a tiin an hna tha zawk leh thiam zawka an thawh thei nan te, an hnuai thawkte tha taka an kaihruai thei nan te leh miten rawn tlaka an hmuh theih nan thil awmsa te chik leh zual turin leh thil thar a awm pawha chungte chu zir zela mahni in update turin MDOA member te chu a chah a. An hnathawhna hmunah Sawrkar in dan a neih sa angte chu hriat chian leh bel a tul thu sawiin dan in a phut ang zela kan kal hi a tha in a him ber a ni, a ti.

Social media in nun kawng tin renga a nghawng nasat chungchang sawiin Minister chuan social media kan hman dan hi kan fimkhur a tul hle a, thu leh hla, thlalak leh video kan post dan te hi dan kalh leh dan bawhchhiatna a ni em tih te hi kan ngaihtuah chian a ngai hle a, a ti a. An chhungkaw ah te, an hnuaia thawk te leh an Department theuha social media hman dan chungchang hi inzirtir leh inhrilh nawn fo turin a chah bawk a ni.

General Body meeting hawnna hi President MDOA, Pu Lalchuailova'n kaihruaiin Executive Member MDOA Dr. A Lalchhandami Fanai in Pathian hnena inhlanna hun a hmang a. Vice President MDOA Dr. JT Vanlalngheta’n palai te lawmin Sawrkar inrelbawlna leh kalhmang ah MDOA member te chuan dinhmun pawimawh tak an neih thu a sawi a. General Secretary Pi Lalsangpuii, chuan pawl kalhmang leh tunhnaia an hmalakna te sawiin Report sawina hun a hmang a. First session hi Treasurer MDOA Pi PB Lianthangpuii in lawmthu sawiin hun a khar a ni.

Chawhnu session ah rorel inkhawm hman niin thu ngaihtuah tura chhawpchhuah te chu sawiho a ni a. Hruaitu thar thlanna pawh neih niin MJA hruaituten inthlanna hi an buaipui a ni. Kum 2021-23 atana MDOA hruaitu atan thlan tlin te chu – Pu Lalchuailova, Pi PB Lianthangpuii, Er. Lalrammawia, Pu C. Vanlalchhuana, Dr. JT Vanlalngheta, Pi Lalsangpuii, Pi Laltleipuii, Pu C. Lalnunmawia leh Pu H. Vanlalhlupuia te an ni.

MDOA hi kum 1982 a din niin Department 29 te chuan Association hi zawmin member 500 chuang an awm mek a ni.