No.3150/2021-2022
Aizawl, the 25th November 2021 : New Delhi-a cham mek Sports Minister Pu Robert Romawia Royte chuan nimin khan Union Youth Affairs & Sports Minister Pu Anurag Singh Thakur chu New Delhi-a a chenna inah kawmin, India ramin sports-a hma a sawn zel dan turte an sawi dun a. Minister Pu Robert Romawia Royte chuan Mizoram sorkarin hmasawnna ruhrel siam nana rawtna a thlen tawhte sanction rang tura a ngen chu Union Minister chuan a lo enzui vat tur thu a hrilh a ni.

Nimin vek khan Pu Roberta chuan Union Minister of State for Home and Sports Pu Nisith Pramanika chu a pisaah kawmin, Mizoram-ah state sports projects thawh zawh tawh engemaw zat an neih thar thu hrilhin hawng turin a sawm a, Union Minister of State Pramanika pawhin a tum tur thu a hrilh a ni. Minister hi Mizoram Lok Sabha MP Pu C. Lalrosanga'n a tawiawm a ni.

Tourism Minister ni bawk Pu Robert Romawia Royte chuan Union Tourism Secretary Pu Arvind Singh pawh kawmin, Mizoramin Tourism hmasawn nana rawtnate Tourism Ministry leh Ministry danga an thlen te a sawipui a, Mizoram Tourism-in harsatna a tawh te pawh a hrilh bawk. Minister hian Lunglei Multi Utility Centre siamna tur atana Rs.4600 lakh man project a thehluh pawh sanction rang turin a ngen bawk.

Sports Minister Pu Robert Romawia chuan Union Sports Secretary Sujata Chaturvedi bakah Joint Secretary leh Director te sawmkhawmin meeting a neihpui bawk a. Mizoram tana project hrang hrang Sports Ministry-a tang mekte uluk takin an thlirho a ni.

ICT Minister ni bawk Pu Roberta chuan IT hmasawnna projects te Minority Affairs Secretary Pi Renuka Kumar leh Joint Secretary te sawipuiin tunhnaia sanction an pek avangin lawmthu a hrilh a. ICT Deptt project tharte pawh sanction leh vat turin Skill Ministry hotute a ngen nghal a ni.

Sports Minister hian naktuka The Hindu chanchinbuin a buatsaih tur North East Sports Conclave, Hotel Radission Blu, Guwahati-a neih turah a tel dawn a, Speaker 3 ruat zinga pakhat a ni ve dawn a ni. Assam CM leh Union Sports Minister Anurag Singh Thakur pawhin Keynote Address an nei ang.

Union Minister of State for Home and Sports Pu Nisith Pramanik chu a pisaah kawm bawkin thil tam tak an sawi dun a.