No.3151/2021-2022
Aizawl, the 25th November 2021 : Lunglei DC Pu Kulothungan A, IAS hmalakna in India ram chhung hmun hrang hrang-a NGO foundation/ Company/ Corporation te atangin CSR kaltlangin mipuite tana hlawkpui leh tangkai pui theih tur Medical lam kaihhnawih bungraw hrang hrang ngaihven chhunzawm zel a ni a.

He hmalakna kal zelah hian HABITAT FOR HUMANITY INDIA, MUMBAI atangin Medical bungraw hrang hrang a vaiin cheng nuai sawm man hu (Rs. 10,00,000/-) dawn a ni.

Heng medical equipments te Christian Hospital Serkawn hotute hnena hlanna chu vawiin chawhnu khan Lunglei DC Office ah neih niin DC Pu Kulothungan A chuan Dr Lalramzauva, Director, Medical & Health Department, BCM hnenah a hlan a ni. Lunglei DC Pu Kulothungan A chuan Christian Hospital Serkawn leh Covid-19 positive te enkawlna hmun changtlung tak Baptist Covid Care Centre (BCCC)-a an hnathawhna leh damlote tana an inpekna avangin lawmthu a sawi a. Hospital leh Covid Care Centre enkawl chu thil namai lo leh sum leh pai senso pawh a hautak hle a ni tih Sawrkarin a hriatpui a ni tiin vawiina Covid-19 dona hmanrua te pawh tangkai taka hman ngei anih a beisei thu leh an mamawh dangte pawh ngaihtuah chhunzawm sak zel a tum thu a sawi a ni.

Vawiina Covid-19 dona hmanrua hlan te hi Oxygen Concentrator paruk, Glucometer pariat, Pulse Oximeter panga, Thermometer panga, ICU Para Monitor pathum, Nebulizer pahnih, Digital BP Apparatus pathum leh PPE Kit 300 te an ni.

Baptist Covid Care Centre (BCCC) hi July 28, 2021 khan hawn niin July 30 atangin Covid damlote admit-a enkawl tan an ni a. BCCC-ah hian tun dinhmunah khum 23 awmin Doctor 1 leh Nurse 4 te bakah Office staff 2 leh thawktu dang 7-in an enkawl mek a.