No.3152/2021-2022
Aizawl, the 25th November 2021: Vawiin chawhnu khan Revenue Minister Pu Lalruatkima chuan sawrkar hmalak mek – Surveyor Training Institute din leh a hmunhma chungchangah Hualngohmun khawtlang hruaitute a Office Chamber-ah a titi pui a. Mizoram sawrkar tana hmasawnna ruhrel lian dinna chungchanga tha taka sawrkar thawhpui turin a sawm a ni.

Hualngohmun khawtlang hruaitute nena an inkawmnaah hian Revenue Minister Pu Lalruatkima chuan Mizoram Surveyor Training Institute, Hualngohmun sak na turin Mizoram Sawrkar chuan Planning Department kaltlangin Ministry of Science & Technology, Government of India hnenah November 12, 2021 khan Concept Paper a thehlut tawh a. He dilna thehluh hma hian amahin Ministry te pawh a dawr lawk tawh tih sawiin a hlawhtlin ngei pawh a beiseiawm thu a sawi a. He project atan hian Rs 54.9 Crore lai estimate siam a ni a ti.

Pu Ruatkima chuan Kum 2008-ah khan Hualngohmun Village Council in Sawrkar hnenah ram 24.22 Bigha a lo hlan tawh a. Directorate level leh Khawtlang aiawh ten thudelhkilh siamin hun bi tuk chhunga hmalakna a awm loh chuan ram neitu hnenah hlan leh ni se tih a awm tih pawh an hriat thu a sawi a. Minister chuan he inremna a lo awm tawh avang hian a hmun thu hlaah Revenue Department chu thuneitu ni mahse khawtlang hruaitute rawn hmasak chu a pawimawh hmasa nia angaih thu leh khawtlang hruaitute pawhin rem an tih pui ngei a rin thu a sawi a. He hmalakna pawimawh tak hi tuna Mizoramin a mamawh em em leh Surveyor mamawhna sang lutuk tih ziaawm na tur a nih thu a sawi a ni.

Pu Ruatkima chuan tunah hian Aizawl District-ah ringawt pawh House Pass dilna ringawt pawh nitin 100 tel teh meuh a lut a, thawk chhuak tur erawh chuan Surveyor 10 pawh an neih tlin loh thu te, District dang pawh chutiang ang an nih deuh vek thu a sawi a. Mizoram Surveyor Training Institute chu din a nih theih beiseina lian tak an nei tih sawiin he hmun pawimawh hi a awm hunah chuan surveyor mamawh sang em em leh inhmun, lo ram ri felfai tawk lo te hi chinfel hna rang zawk a thawh theih a ni dawn a. He training Institute hi Hualngohmunah din a nih chuan khawtlang ang pawha chhawr tangkaina tur tam tak a awm thei ngei in a rin thu a sawi bawk a ni.

Hualngohmun khawtlang hruaitute aiawhin Village Council member te leh YMA hruaitute pawhin an ngaihdan tlang takin an sawi a. Hualngohmunah Mizoram Surveyor Training Institute chu din ngei se an duh thu te sawiin kum 2008 hnu lama hmalakna hmuhtur awm loa chawlhsan vang vang ang kha chu a thlen erawh an rem ti lo tih an sawi a ni. Khawtlang hruaitute an nih angin an member dangte nen committee la neih leh a - sawiho erawh an tum tih an sawi a. He hmalakna pawimawh tak hi khawtlangin lungrual takin an remtih tlan ngei pawh an beisei thu te sawiin sawrkar chu he hmalaknain a tak ram a chan thuai theih nan chak taka nawr turin an beisei nghal dawn tih an sawi bawk a ni.

Mizoram Surveyor Training Institute sakna hmunhma inrawnkhawmnaah hian Pu C.Lalrosanga, Joint Secretary, LR&S pawhin sawrkar hmalakna leh an thlen chin te, Revenue Department thuneihna te leh hriattur pawimawh dang te a sawi a. Revenue Official te pawhin hriattur pawimawh te an sawi bawk a ni.