Tukin zingkar khan zun leh ek thlahdah awm lo tura hma lakna hapta (freedom from open defecation week) chu Lawngtlai Bazar Venga Areopagy hmunah Lawngtlai Bawrhsap Dr A. Muthamma IAS chuan a hawng.

Lawngtlai District Swachh Bharat Mission (Gramin) buatsaih he hun hmannaah hian Khuallian Lawngtlai Bawrhsap chuan Lawngtlai District chu zun leh ek thlahdah awm lohna, chhung tinin inthiarna tha tawk an neih vekna district-a siam turin hma lak mek a nih thu a sawi a. Kawng tinrenga hmasawn turin hrisel a pawimawh a, hrisel tur chuan faina leh thianghlimna kawnga kan invawn a pawimawh a ni tiin, mipuite'n tangruala open defecation free district ni tura hma kan lak chuan kan hlawhtling ngei ang, a ti.

Khual zahawm, Miss India Mizoram Rody H. Vanlalhriatpuii chuan faina leh thianghlimna kan ngaih pawimawh dan hi kan mize lan chhuahna a ni tiin, mahni in leh a vel leh khawlai te vawng fai a, bawlhhlawh thlahdah lo turin kal khawmte a chah a. Mite'n faina kawnga an thlen theih chu keini paw'n kan thei ve tih hriat chian a pawimawh, a ti a. Hemi hnu hian ODF Week intiamkamna thu a sawi rualtir nghal bawk.

He hun hi Lawngtlai Addl DC Pu H.Dolianbuaia'n a kaihruai a. Govt Lawngtlai College-a Assistant Professor Dr David V. Khiangte chuan open defecation free awmzia leh nihphung te, a pawimawhna leh hmasawnna leh changkanna nena  a inzawm tlat dan te a sawi a. District SBM(G) Member Secretary, PHE EE Er Laltlanchhunga chuan lawm thu sawiin, hun khar a ni a. Hemi hnu hian zirlai kal khawmte chu insem darhin, khawlai then fai hnatlang neih chhunzawm nghal a ni.

He hunah hian LADC-a EM te, sawrkar official leh tlawmngai pawl ai awh te bakah, Don Bosco School, Downtown English School leh Ngurnunsangi English School zirtirtu leh zirlai thahnem tak an kal khawm a ni.