Ruihtheih thil hmangsualtute mumal taka enkawl an nih theihnana a enkawlna hmunin a mamawhte leh tul pawimawh dang engengemaw awmte vawiin khan Aijal Clubah Social Welfare Department bultumin sawihona neih a ni a. He Consultation Meeting on Accreditation of De-addiction Centres in Mizoram hi Pu P.Lalchhuanga, Secretary, Social Welfare Department changtu in a hmanpui.

Meeting-ah hian Mizoramah pawl hrang hrangin ruihhlo ngaite enkawlna an kalpui mekah duhthusama tha inenkawlna (standardized treatment) tha leh inenkawlna dan mumal tak (minimum standard of care) a awm loh avanga inenkawlna awmze nei a thlen loh thin thu sawilan a ni a.Hemi avang hian enkawlna mamawhtute leh damna kawng zawh mekte mamawh a phuhruk tawk thin loh thu tarlan a ni. Hetiang hi Mizorama inenkawlna centre te dinhmun anih avangin accreditation chungchanga inkaihhruaina mumal tak duan (minimum standard of care) a pawimawh hle tih sawiho a ni a. Accreditation ah hian enfiah (inspect), vilzui(monitoring) leh endik(evaluation) apawimawh hle tih thu tarlan a ni bawk a, hei bakah hian minimum standard of care kalpui dan enfel tur mi bik ruata zirtir a tul thu leh accreditation leh enkawl zuina neih dan, enkawlna hmuna endikna buatsaihte a tul thu sawilan a ni.

Meeting hi Pi K.Vanlalrawni, Addl Secretary, Social Welfare Department in a kaihruai a, Pu Debashis Mukherjee. International Expert on Substance (Drugs) Abuse in a hmanpui bawk a ni.

Meeting-ah hian Sorkar department hrang hrang aiawh te leh ruihtheih thil ngaite enkawltu pawl hrang hrang hruaitute an tel a ni.