Nimin (6.6.2017) khan Lawngtlai District Level Committee on Green Mizoram chu Additional Deputy Commissioner Pu H.Dolianbuaia MCS hovin Lawngtlai DC Conference Hall-ah an thu khawm a. Green Mizoram Day 2017 hman dan tur an rel. 

Green Mizoram Day hi June ni 11-a hman thin ni mah se, kumin hian Pathiannia a tlak avangin June ni 9-ah hman a ni dawn a. Committee chuan kumin hian thing tiak 350 vel phun ni se, department hrang hrangin chan insemin Mampui kawng dungah phun ni se, phun tur thing leh a phun dan tur pawh uluk taka ruahman ni se, a ti a. A phun tam lam aiin a nung tam lam ngaih pawimawh zawk tum niin, thing phuntute paw’n mahni thing phunte puitling ngei tura tha taka enkawl zui ni se, tih a ni bawk. 

He meeting-ah hian June ni 9, 2017 (zirtawpni)-a Lawngtlaia Green Mizoram Day hawnna hun hman dan tur duan nghal a ni a. Chawhma dar 10-ah DC office tualah Lawngtlai DC hovin hawnna hun hi hman tur a ni a. He hunah hian kangmei veng tha khuate hnenah chawimawina (village level fire prevention award) hlan leh tum a ni. 

Nikum Green Mizoram Day-a Lawngtlaia sawrkar department hrang hrang leh NGO-te’n thing tiak 310 an phun zinga 227 (73%) chu nungin, a nung lote pawh Forest Department-in a thlak leh vek tawh a. Department thenkhat uluk taka mahni thing phun enkawl zui an awm laiin, ngaihsak zui hlawh lem lo pawh Forest Department hian a enkawl zui vek a. Tum thum lai a hmun sam fai hna an thawk tawh a ni.