Nimin (6.6.2017) khan Lawngtlai District-a Intensified Diarrhoea Control Fortnight (IDCF) hman dan tur relin District Steering Committee chu Addl DC Pu H.Dolianbuaia MCS hovin a office chamber-ah an thu khawm. 

Meeting-ah hian kawthalo vanga naupang thi an awm lohna tura National Health Mission (NHM) hnuaia June ni 12-24, 2017 chhung kawthalo do beihpui thlak dan tur rel a ni a. IDCF 2017 hman chhunga hma lakna tur hrang hrang sawi ho niin, hemi chhung hian health worker leh ASHA te’n an bial chhunga naupang kum 5 hnuai lam awmna in tinah ORS pack khat theuh semin, a siam dan an zirtir nghal vek ang a; kawthalo an hmuh chhuah erawh chuan ORS pack hnih leh zinc tablet an pe thung ang. Sikul leh anganwadi centre-ah te kut sil fai zirtirna buatsaih a ni ang a; he’ngte hi tha taka kalpui a nih theih nan District Steering Committee hian a vil zui dawn a ni. 

IDCF 2017 hi June ni 12, 2017-ah CMO Conference Hall-ah a hawnna hun hman tum a ni. He chawlhkar hnih chhung hian TV leh chanchinbu kal tlangin a zau thei ang bera hemi chungchang inzirtirna tha theh darh tum a ni bawk. 

Intensified Diarrhoea Control Fortnight hi kum 2014 atang khan hman tan niin, kum tin vawi khat hman thin a ni a. A tum ber chu kawthalo vanga naupang kum nga hnuai lam thihna tihrem te, chumi atana kut sil fai leh tui thianghlim in pawimawhzia inzirtir leh kawthatloh chang pawha ORS-Zinc tablet hmanga inenkawl dan inzirtir te a ni.