Vawiin chawhnu khan Pu H. Lalrinpuia, SDO (Sadar) kaihhruaiin Lunglei DC Conference Hall-ah Lunglei District Level Green Mizoram Committee an thukhawm a, Green Mizoram Day 2017 hman dan tur an rel.

Committee chuan kumina Green Mizoram Day, June Ni 11 chu Pathianni a nih avangin June Ni 9 (Zirtawpni) ah hman nise an ti a. LAD Minister Pu PC Lalthanliana  chu Khuallian atan sawm nise an ti. Hawnna inkhawm hi Chawngbawla Hall, Pukpuiah chawhma dar 11:00-ah neih nise an ti a. Inkhawm zawh hian nikum leh kum hmasa lama Lunglei to Aizawl kawngpui (World Bank Road) dunga thing phun tawh te enkawl zui leh a tulna apianga thing phun belh nise an ti bawk.

Thing phun turte hi Forest Department High Tech Nursery atanga lak tur a ni a. Kumdanga tih thin angin kuminah pawh Department leh NGO hrang hrang atangin mahni thingphun enkawl hma la tha te thlan leh nise an ti a. Thingphun pawimawhzia inhrilhriatna school leh kohhran hrang hrang ah te nei tura ngen nise an ti bawk.