Mizorama development projects, schemes leh programme hrang hrang cheng vaibelchhe 50 chunglam chin senso-na, chak tak leh a hun taka zawh a nih theihna tura endika viltu tur Chief Minister Pu Lal Thanhawla kaihhruaina hnuaia din, High Level Monitoring and Surveillance Committee I (HLMSC I) chu vawiin chawhnu khan a Chief Minister hovin Chief Minister Office Conference Room-ah meeting pawimawh tak an nei.

Meeting-a thuhma a sawiah Chief Minister Pu Lal Thanhawla chuan NEC Plenary meeting hmani lawka New Delhi a neih a, Mizoram chu thil danga ti tha mahse project implementation lamah tan lakna tur a la nei tam tih sawilan a nih thu a sawi a. NEC leh NLCPR hnuaia project te nakin zelah Mizoram tan phurrit liabilities a nih loh nan, a hun taka zawh anih thei nan theihtawpa tan lak a pawimawh tih a sawi a. Heng project leh scheme hrang hrangte hi vil ngun a pawimawh avangin he High Level Committee pawh hi din a a ni a ti.

HLMSC I meeting-ah hian Environment, Forests, & Climate Change Department hnuaia Green India Mission project te; Mizoram Scholarship Board in scholarship hrang hrang a buaipui te; Power & Electricity Department hnuaia Tlawva Small Hydel Project leh R-APDRP Part ‘B’ project te; PHE Department hnuaia Swacch Bharat Mission(Gramin) project te; PWD hnuaia project/scheme 14 te; Rural Development Department hnuaia MGNREGS te; Rashtriya Uchchatar Shiksha Abhiyaan (RUSA) hnuaia project/scheme 6 te; School Education Department hnuaia project/scheme 2 te; State Investment Program Management & Implemention Unit (SIPMIU) hnuaia project 2 leh Tourism Department hnuaia project 1 te chu March 2017 quarter ah an thlen chin tarlan niin an hmabak leh harsatna an neih te chu a changtu Department hotulu ten sawizauin zawhna awmte an chang nghal a ni.

Heng project leh scheme te hnathawh dan leh a hun taka zawh anih theihna tura hmalak dan tur ngun takin an thlirho a. Projects uluk taka a bulthut atanga ruahmanna tha tawklo a awm thin avanga a hun taka zawh hman loh awm thin te, sum ruahman dan fel tawk loh laite leh state matching share requirement ruahmanna fek zawk neih dan te an rel a. Project leh scheme te tithuanawp thei tur risk assessment fel tak nei thin tur leh chu risk tih tlem dan tur ruahmanna siam ni se an ti a. Loan hmanga development projects te fimkhur taka kalpui leh high impact nei zawnga kalpui nise tihte an rel a ni.

HLMSC I hi Mizoram sorkar ina Approach to Development Comprehensive Growth Strategies a lo pawm tawh hmalakna pakhat a ni a. A hnuaiah hian HLMSC II awm bawkin Chief Secretary kaihhruaina hnuaia awm, Rs.50 Crore hnuai lam project te a huam a ni.

Meeting-ah hian Finance Minister, State Planning Board Vice Chairman, Chief Secretary, Principal Secretary to Chief Minister, Finance Secretary, Planning Department Secretary, PWD,PHE leh P&E Engineering in Chief te bakah official pawimawh dang an tel a ni.