1028/2023-2024

2023 Vawkhniahzawn thla ni 4: Samagra Shiksha hnuaia high school leh higher secondary school thlan bikte hnena smart classroom-a hman tur interactive panel pek tura ruahman chu vawiin khan Lawngtlai District chhunga a dawng tura thlan sikul 14 te hnenah Mizoram Legislative Assembly Deputy Speaker Pu H. Biakzaua chuan a hlan.

Lawngtlai College Venga Samagra Shiksha Lawngtlai District Project Office-a interactive panel semna hun buatsaihah Khuallian Pu H. Biakzaua chuan ram hmasawn zelin a ken tel zirna atana thil ṭangkai tak, tunlai thiamna nena ṭang kawpa zirna kalpuina tur hmanrua sem theih a ni chu lawmawm a tih thu sawiin, a dawngtu sikulte pawhin ṭangkai taka an hman ngei a beisei thu a sawi a. Mizoram sawrkarin zirna lama hmasawnna a awm theih nan kawng hrang hranga hma lain, zirna lamah sum pawh ṭhahnem tak a dah tih sawiin, Lawngtlai District-ah pawh zirna kawnga hmasawnna hmuh tur a awm zel chu lawmawm a tih thu a sawi a. Sawrkar hma lakna thlawp a, zirna kawnga hmasawnna a awm zel theih nan zirna lama thawktute, zirtirtute leh zirlaite chu theih tawp chhuah zel turin a chah a ni.

He hun hi Samagra Shiksha, Lawngtlai District Project Coordinator (DPC) Pi R. Lalnunthari chuan kaihruaiin, kal khawmte lawmna thu a sawi bakah, hun hman chhan a sawifiah a. APO (MIS) Pu H. Lalmuanpuia chuan interactive panel hman dan tlangpui a taka entirin a sawifiah bawk.

He hunah hian interactive panel dawng tura thlan chhuah sikul zirtirtute leh zirlaite an kal khawm a ni.