Chapchar Kut 2018 chu vawiin khan Lawngtlai Bawrhsap Pisa tualah hman a ni a. LADC Chairman Pu V. Zirsanga chu Kut Pa niin, Lawngtlai Bawrhsap Dr Arun T., IAS chu Kut Thlengtu a ni.
Kut Pa, Pu V. Zirsanga chuan, hnam tinin nunphung hran theuh kan nei a, chu'ng kan hnam nunphung leh tihphung te chhawm nun zel chu thangtharte bat a ni, a ti a. Chapchar Kut pawh Mizote'n hlimna, lawmna leh hahchawlhna kuta kan hman thin a nih ang ngeiin hlim taka hman tur a ni, a ti. Kut thupui "Sem sem, dam dam; ei bil, thi thi" tih chu pi pute khawtlang inlungrualna leh inpumkhatna thatzia tar lanna a ni a; kumin Chapchar Kut pawh hi hnam zia leh finna, rohlu ngaihhlut tur min ngaihhluttirtu ni se a duh thu a sawi a. Thangtharte'n pi pu nun mawi kan thlahthlam hnu, tlawmngaih, aia upa zah leh tih bik awm lova mi dangte tana inphalna te chu din thar a, tinung leh turin Kut hmangtu zawng zawng a sawm nghal a ni.
Kut Thlengtu Lawngtlai Bawrhsap Dr Arun T chuan Kut hmang tura kal khawm zawng zawngte Kut chibai bukin, duhsakna a hlan a. Chapchar Kut chu hlimna ni a nih ang ngeia hlim tak leh nuam taka hmang tura sawmin, mahni hnam nun ze mawi te kalsan lo va, ngaihhlut nachang hre tur leh chawi nung zel turin a chah bawk.
Lawngtlai Area Baptist Choir-in Kut hawnna hla remin, Rev. B. Zazawna Lai, AGS i/c Mission, LIKBK chuan hunserh a hmang a. MUP Sub Hqtrs Lawngtlai-in hlado leh bawhhla chhamin tlang an tlir a. College Veng leh Council Veng Branch YLA te, Don Bosco School, LWA Chandmary Branch leh MHIP Sub Hqtrs Lawngtlai te'n hnam lam chi hrang hrang - cheraw, pawhlohtlawh, chawnglaizawn, sarlamkai leh chheih lam te an entir a. MHIP Sub Hqtrs Lawngtlai hian hmanlai hun atanga bunbi indawt zela Mizote incheinain hma a sawn dan an entir bawk a. Lawngtlai pawn lam atanga zaithiam lo kal - Zomuanpuii leh Eunice Lalngaihsaki te leh tualchhung zaithiam - Melody Kumsangmawii Chhangte leh Lalremliani te'n hnam zai chi hrang hrang hmangin kal khawmte an awi a ni.
Organising Committee-in Chapchar Kut Miss 2018 thlan chu Lawngtlai Photographers Association kuta a dah angin, LPA chuan Kut hmannaa hnam thuama kal nula nalh zual panga an thlang chhuak a. Chapchar Kut Miss 2018-ah Mimi K. Lalenmawii, Electric Veng chu thlan a ni a; 1st Runner Up-ah Lalrinengi, College Veng leh 2nd Runner Up-ah Hmingthanzuali, College Veng te thlan an ni. Hnam thuam inbel naupangte atangin Chapchar Kut Little Miss-ah Malsawmsangi, AOC Veng leh Mister-ah Mark Rohlunthanga, Electric Veng te thlan an ni bawk.
Vawiin Lawngtlaia Chapchar Kut hmannaah hian LADC member-te, state leh LADC hnuaia official leh staff te, thu thar theh darhtute, tlawmngai pawl hrang hrang ai awhte, khawtlang hruaitute leh mipui thahnem tak an kal khawm a. Artui inbarha chhawng hnawtin, theitui leh chhangban ei ho a ni a. Hlim taka chaipui leh lam thaipui hun hmangin, Kut hi khar a ni.
