Mizote Kut Pui ber Chapchar Kut chu Mizoram hmun dang rualin Kolasib ah pawh vawiin khan Tumpui Playground ah lawm a ni a. Pu KS Thanga, Minister Agriculture etc chu Kut Pa a ni a, Pu PC Zoram Sangliana, Kolasib Bialtu MLA chu Kut thlengtu a ni. 

Kut thlengtu Pu PC Zoram Sangliana chuan inlawmna thu sawiin Mizo Inthuamna mawi tak kan neih chu Chapchar Kut leh Cheraw kaltlangin khawvelin an hmel hriat tih a sawi a. India in Commonwealth Games an thlen pawhin India team hruaitu chuan Mizo Kawr chei leh Mizo Puan chei a in bel a ni a ti a. Heng kan Hnam inthuamna te leh kan hnam lam te hi kan chawilar zel a tul a ti.               

Kut Pa Pu KS Thanga chuan ' Kan Culture leh Kan Kut neihte kan vawnnun zel a pawimawh' tih sawiin Kristian kan nih tirh lamah kan Culture thil leh Kristianna inhmeh lo ah ngaiin Kohhran pawhin a dodal chungin Kristianna leh kan Culture te kan hmet rem thiam chho zel a, 1974 vel atangin Chapchar Kut te pawh mumal takin hman a lo ni chho leh ta a, vawiin ah phei chuan Kristianna nen indal hauh lovin Kut hi kan hmang thei ta a ni a ti.

Kut Pa chuan Chapchar Kut lo chhuah dan sawiin Chapchar Kut hi Mizoram a kan luh hma, Chin State a kan awm lai atanga hman thin a ni tiin 1936 chho khan Superintendent Office a thawktute chuan an lo hmang tawh thin a, 1952 ah Mizo District Council a lo pian khan Pawl Kut, Chapchar Kut leh Mim Kut te chu Office chawlh atana hman thin a ni a, mahse tun anga a mipui nawlpui a hman a awm tak tak lo a. 1974 atangin mumal taka hman a ni a, 1981 atang chuan State Level Committee te in dinin a changin Sorkar lam huaihawt a hmangin a changin YMA huaihawt a hman a ni thin a, tunah chuan Sorkar leh YMA lam ten neitu chan chang ve ve in kan hmang thin ta a ni a ti.

 Pu KS Thanga chuan kumin a Chapchar Kut thupui, ' Sem sem Dam dam, Ei bil thi thi' tih chu Mizo Pi leh Pute tanga kan inhlan chhawn thu mawi tak a ni a, a mawi satliah a ni mai lova, Mizo tlawmngaihna nen a inhmeh tih pawh sawiin a inhmeh a ni tiin, Mizoram Sorkar in a kalpui mek Flagship Programme NLUP te nen pawh a inmawi hle a ni a ti. 

Pu KS Thanga chuan Mihring kan nun ah remna, muanna leh zalenna a hlu tih sawiin a hlutna hre thiam tur erawh chuan hreawmna tam tak kan paltlang hmasak a ngai a ti a. Mizoram in hun rei tak hun khirh leh hreawm kan tawn hnuah Zalen tak leh boruak muanawm tak hnuai a Chapchar Kut kan hmang leh thei ta te hi kan ram hruaitute inpekna vang ani tih kan hriat thar fo a tul a ti bawk

Pu C. Liankunga Chairman, Chapchar Kut Organizing Committee pawhin  thu sawiin kut hmana  nih theihna tura tha leh tui thawhtute, hmanrua leh thil dang thawhtute chungah lawmthu sawiin Chapchar Kut hmang tura kalkhawmte chu Zonunzemawi nunpui vek tura chah tharin kan Zonun Zemawi leh Kristian na hi a inhmeh tak zet a, Kristian takin a Mizo theih a, Mizo takin a Kristian theih a ti bawk.

Chapchar kut lawmna ah hian MCO, YMA leh MHIP ten lam mawi tak tak an en tir bakah zai mawi tak tak ngaih thlak a ni a, MUP ten hla do an chham bawk a. Tlai lamah Kut Lunglen hun hmangin Kolasib bakah Zoram chhunga zaithiam te leh Kolasib a Band tha te an in lan a ni.