Chapchar Kut 2019 chu vawiin khan Lawngtlai Bawrhsap Pisa tualah hlung taka hman a ni a. Lawngtlai East bialtu MLA Pu H. Biakzaua chu Kut Pa niin, Lawngtlai Bawrhsap ai awhin Addl DC Dr Andrew H. Vanlaldika MCS chu Kut Thlengtu a ni.

Kut Pa, Pu H. Biakzaua chuan Chapchar Kut chu Mizoram sawrkarin a ngaih pawimawh em avangin zirna in leh office zawng zawng chawlhah puangin, district tinah lawmna hun buatsaih thin a ni, a ti a. Sawrkarin Chapchar Kut lawmna a buatsaih chu hlimhlawp atan ni satliah mai lovin, hnam ziarang leh kan pi pute nun ze mawi chawi nun zel nan te, Zo hnahthlakte lungrual leh hlim taka kan awm ho dial dial theih nan te a ni, a ti. Hnama min dintu Pathian hre reng chunga kan hnam ziarang leh nunphungte chawi nun chu hnam anga din chhuah nan a pawimawh tiin, pawn lamah hnam thuam, lam leh rimawi te, chhung lamah nun ze mawi, aia upa zah, tlawmngaihna, rinawmna, thianghlimna, taimakna leh huaisenna hmang te'n chu chu kan tipuitling thei, a ti a. LADC leh CYLA bul tumin Laifate kut ropui tak Hlukhla pawh ni hnih chhung hlung taka hman a ni tiin, thangtharte'n mahni hnam thil ngaihhlut nachang an hre thar zel chu a lawmawm hle a ni, a ti. Chapchar Kut lai chuan zu ruih vanga thenawm khawveng inhauh emaw, nupa intihtlan emaw, naupang insual emaw inhauh emaw takngial pawh thiang lova ngaih a ni a, chu chu vawng renga hlim taka kut turin mipui kal khawmte chu a chah bawk.

Kut Thlengtu lam atangin Dr Andrew H. Vanlaldika MCS chuan Kut hmang tura kal khawm zawng zawngte Kut chibai bukin, duhsakna a hlan a. Chapchar Kut chu hlimna ni a nih ang ngeia hlim tak leh nuam taka hmang tura sawmin, Kut thupui "Zofate Inpumkhatna" tihlawhtlingtu ni theuh turin a chah.

CYLA Choir-in Kut hawnna hla remin, BCM Lawngtlai Area Executive Secretary Rev. R. Lalbiakliana chuan hunserh a hmang a. MUP Sub Hqtrs Lawngtlai-in hlado leh bawhhla chhamin tlang an tlir a. CYLA cultural troupe, LWA Chandmary Branch, MHIP AOC Veng Branch leh Southern Standard Middle School te'n hnam lam chi hrang hrang - cheraw, chawnglaizawn, sarlamkai leh chheih lam te entirin, Don Bosco School naupang Stephen-a'n beatbox a rem a. MHIP Sub Hqtrs Lawngtlai chuan hmanlai hun atanga hunbi indawt zela Mizote incheinain hma a sawn dan an entir a. Lawngtlai pawn lam atanga zaithiam lo kal - Zorinzuali Khiangte, Sangkimi Khiangte leh Teawmi Ralte te leh tualchhung zaithiam - Sharon Khualchhawn, Mercy Remsangmuani leh Gordon Yung South te'n hnam zai chi hrang hrang hmangin kal khawmte an awi a. Association for Voluntary Blood Donation (AVBD) Lawngtlai atangin thisen pek uar inzirtirna hun hman a ni bawk. 

Organising Committee-in Chapchar Kut Miss 2019 thlan chu Phawngpui Photographers' Association (PPA) kuta a dah angin, PPA chuan Kut hmannaa hnam thuama kal nula nalh zual an thlang chhuak a. Chapchar Kut Miss 2019-ah Jasmine VL Hruaii, Vengpui-II chu thlan a ni a; 1st Runner Up-ah Grace Zoremsangi, Council Veng leh 2nd Runner Up-ah MC Lalrintluangi, Lawngtlai-III te thlan an ni. Hnam thuam inbel naupangte atangin Chapchar Kut Little Miss-ah P. Lalruatdiki, Electric Veng leh Mister-ah Lalramhlimpuia, Bazar Veng te thlan an ni bawk. 

Vawiin Lawngtlaia Chapchar Kut hmannaah hian state leh LADC hnuaia official leh staff te, thu thar theh darhtute, tlawmngai pawl hrang hrang ai awhte, khawtlang hruaitute leh mipui thahnem tak an kal khawm a. Artui inbarha chhawng hnawtin, sawhchiar pir a, thingpui in ho a ni a. Hlim taka chaipui leh lam thaipui hun hmangin, Kut hi khar a ni.