Mizoram hmun dangte rualin Siaha-ah pawh vawiin chawhma dar 10:30Am atang khan District Playground, Siaha vaihpi-ah Chapchar Kut-2019 programme hlimawm tak hman a ni.

Vawiin Chapchar Kut lawmna Programme-ah hian Pu A. Zakia, Padma Shri Awardee chu Kut Pa niin, Pu T.Vanlalmalsawmsanga, Project Director, DRDA chu Kut Thlengtu a ni bawk. Kut hawnna hla hi MYA, New Siaha zaipawl ten sain, Pu H. Lalchhinga chuan Hlado  a Chham.

Chapchar Kut-2019 lawmna-ah hian Siaha District a School hrang hrang atangin Zirlai naupangten Pawnto hmuhnawm tak an entir a, Hnam incheina leh hnam lam hrang hrangte chu M.U.P; M.CH.P; L.W.A; M.H.I.P; M.T.P; Y.L.A; Y.M.A ;M.G.F te bakah Group lam entirtu Siaha Dancer Association, Next Generation leh D-Trix ten an entir bakah lamthiam leh zaithiam thahnem takin a group leh a mal tein mipui kalkhawmte chu lam leh zaiin an awitlei bawk a ni.

Kum tina an lo tih thin angin Miss Chapchar Kut thlan niin, Nl. Malsawmtluangi Ralte, New Colony chu Miss Chapchar Kut, 2019 atan thlan a ni a, 1st Runner-up atan Nl. Remruatdiki, Siaha vaihpi-III leh 2nd Runner-up atan Nl. Judith Siakhai, New Siaha te chu thlan an ni bawk. 

Vawiin Chapchar Kut lawmna pual hian Hnam Incheina a inthuam nalh berte thlanna neih niin, Mipa puitling a inchei nalh ber atan Pu Zamvela Ralte chu thlan a ni a, hmeichhe puitlingah Pi Remhniangi chu thlan a ni. Hmeichhe naupang-ah Christina Rosangpuii d/o C. Lalrosanga, New Siaha chu thlan a ni bawk.

Kumin Chapchar Kut puala Essay inziahsiakna buatsaih a lawmman pakhatna dawngtu chu Tv. Lalmama, Government Saiha College a B.A.2nd Sem. zirlai a ni a, pahnihna-ah Tv. Sacho, Siatlai leh pathumna atan Pu M. Baithai, Editor Chhim Aw te an ni. Thawnthu insawisiakah Tv. Lalhumliana, Council vaih chu pakhatna niin, Pu Zairemthanga Varte, New Siaha chu pahnihna-ah thlan a ni. Best Editorial thlanna neih nghal niin, pakhatna-ah Chhim Aw, pahnihna-ah Moonlight leh pathumna atan The Times of Maraland te chu thlan an ni.

Kumin Chapchar Kut hmanna-ah hian Siaha District tih hmingthatute Tv. NT. Lalbiakkima, Boxer leh Siaha district a thisen pe hnem ber Pu Laltharliana te hnenah Chawimawina Nopui hlan a ni bawk.

Pu T.Vanlalmalsawmsanga, Project Director, DRDA leh Kut thlengtu nibawk chuan lawmthu sawinain vawiin Chapchar Kut-2019 lawmna hun hi a titawp a ni.