Vawiin chawhma dar 10:30 khan LGSA Playground, Lungsenah Chapchar Kut ropui taka hman niin, Pu H. Lalthansanga, President MJA Lunglei chu Kut Pa a ni.
Kut hawnna hun hi Pu J. Dengkunga, Chairman Organising Commtt. chuan kaihhruaiin, Pu H. Lalthansanga, Kut Pa chuan kut hi ropui takin a hawng a, 'Chapchar Kut lawmna hun Lungsenah ropui taka buatsaih a ni chu lawmawm a tih thu sawiin, he Kut hi hlimna a ni a, hlim takin hmang ila, kan thupui, 'Inpumkhatna' anih angin Zo hnahthlak te hi kan inpumkhat lehzual theihna turin ke kan pen zel a pawimawh a, Mizo tihah hian hnam hrang hrang leh tawng tawng hrang hrang hmang kan awm a, tute emaw an tawng a pai deuh avanga hmuh hniam leh kan en hrang ringawt te hian inpumkhatna siam that aiin a tichhe zawk a, min thendarhtu a ni zawk thin a ni. Chuvang chuan inpumkhatna tichhetu ni lovin meichher chhitu zawk nih tum ila, he Chapchar Kut hi kan bul tanna ni se la, Mizo hnam kan dinkhawchhuah theih nan leh hnam dang ten min awpbeh zel lohna turin zirna kawngah pawh tan kan lak a tul a, Mizo thalai te zingah IAS te lo chhuak zel se la, Lungsen khawpui atang ngei hian chutiang mi chu an lo chhuah ngei kan duh a, kan beisei em em a, chu hun chu kan lo thlir reng dawn a ni. He Kut ropui tak hi Mizo hnam leh Lungsen mipui zawng zawng ten hlim takin hmang ila, Zofate kan inpumkhat lehzual zel theihna tur kan bul tan tharna Ni atan i hmang theuh ang u." a ti a ni.
Kut thlengtu Pu Vanlalsanga Joute, VCP Lungsen I pawhin, Kut hmang tura lo kal zawng zawng Lungsen mipui, Kut pa leh a tawiawmtu zawng zawngte leh Official te lawmna thu sawiin, Kut hlim taka hmang turin duhsakna chibai a buk a ni.
Pu Lalrintluanga Khiangte, Vice President, MJA Lunglei pawhin thusawiin, kan pi leh pu chena kan Kut ngaihhlut leh vawiin thlenga kan la chhawm nun reng chu Chapchar Kut hi a ni a, Mizo hnam kan inpumkhat lehzual zel theihna turin he kan Kut hi ngaihluin i chhawm nung zel ang u, a ti a ni.
Lungsena Chapchar Kut hmannah hian Lungsen North leh South Branch, Venglai Branch te bakah MCO, GCES, MHIP ten Mizo hnam lam chi hrang hrang an entir bakah malzai thiam tak tak ten zaiin mipui an awi a, mit leh beng a tlai hle a ni.
