Vawiin khan Mizoram hmun dangte rualin  Khawzawlah Chapchar Kut ropui taka lawm ani. 

Chapchar Kut lawmna  Mualvawm Field-a neihah hian  Pu Robert Romawia Royte Sports & Youth Affairs, ICT leh Tourism Department changtu Minister chu Kut Pa a ni.  Kut Pa  hi Aizawl North III bialtu MLA  Pu C. Lalmuanpuia'n a tawiawm a ni.

Kut Pa Pu Robert Romawia Royte chuan mipui kalkhawmte Kut chibai bukin, Chapchar Kut hian Mizo hnahthlak Mizoram chhung leh pawn ami te min phuarkhawm tha em em a, Zofate Mizo anga kan ropui a, kan dinchhuah a, kan san zel theihnan kan hun pawimawh Chapchar Kut ang chi te hi kan uar sauh sauh a pawimawh a ni a ti.

Sports Minister chuan Chief Minister zahawm tak Pu Zoramthanga leh Deputy Chief Minister zahawm tak, bialtu MLA ni bawk Pu Tawnluia te hmalaknain Khawzawl Mualvawm Field-ah Phullem phah turin Sanction tih fel vek a ni tawh a, Sawrkarin hna tan thuai a tum thu a sawi a. Kum 2014 atanga cheng nuai 337 vel senga sak tan tawh, sum Sanction tawp vanga sak zawh theih tak loh Khawzawl Tourist Lodge pawh Deputy Chief Minister nen an ngaimawhin, sak zawh ngei anih theihnan hmalak an tum tih a sawi bawk.

Pu Robert Romawia Royte  chuan, Khawzawl Mualvawm Field chu  Football Ground tha, International Standard a siam tum anih thu leh  Field tharah Tournament ropui tak Sports Department in an buatsaih dawn a, Mizoram chhunga Team tha mai piahlamah Mizoram pawna Team tha te pawh chahluh an tum dawn tih a sawi a.  Minister chuan  Department a enkawl Sports & Youth Services,  Tourism Department leh ICT Department lam atanga tanlak ngai ang chi-ah chuan theih tawp chhuahin District fuke kim leh changtlung tak anih theihnan theih tawp a chhuah a tum thu a sawi a. Sawrkar tawiawm thin turin Khawzawl leh a chhehvel mipuite Sawrkar tawiawm turin a sawm a. Mizoram State Games ropui tak neih ngei an tum thu leh State Games atana inbuatsaihnan Mizoram District Games buatsaih an tum thu te, Mizoram Sports Policy mumal tak duan an tum thu te a sawi bawk.

He hunah hian Khawzawl Joint YMA President Pu Lalsanglura Hnamte in kalkhawmte lawmna thu a sawi a.  Khawzawl khawpui chhunga YMA Branch 10 ten Hnam lam chi hrang hrang an entir bakah khaw thenawm - Chawngtlai leh Ngaizawl atangte in YMA Member ten hnam lam hmuhnawm tak tak an entir a.  Khawzawl Officers Club bultumin Chapchar Kut Miss thlanna neih a ni bawk a. Chapchar Kut hi Khawzawl mipuiten an hlut hle a ni.