3754/2022-2023

Vau thla ni 3, 2023: Chapchar Kut 2023 chu vawiin khan Lawngtlai Bawrhsap Pisa tualah hlung taka hman a ni a. Mizoram Legislative Assembly Deputy Speaker Pu H. Biakzaua chu Kut Pa niin, Lawngtlai Bawrhsap Pu David Lalthantluanga chu Kut Thlengtu a ni.

Kut Pa, Pu H. Biakzaua chuan Lawngtlai District mipuite Chapchar Kut chibai bukin, Sawrkarin Chapchar Kut lawmna a buatsaih chu hlimhlawp atan ni satliah mai lovin, hnam ziarang leh kan pi pute nun ze mawi chawi nun zel nan a nih thu a sawi a. Chapchar Kut chu hlimna Kut a nih angin hlim taka Kut turin mipuite chu chahin, Chapchar Kut hmang ṭantute chu ram chhuak hlawhchhamte an nih angin hlawhchhamnaa beidawng mai lo va, a eng zawnga hma lam thlirna ni, hma thar lakna ni leh ṭan lak tharna ni atan te, rethei, chanhai leh pachhiate ṭanpui leh chhawmdawl chu Mizo hnam ziaranga bet tlat a nih anga mi dangte duhsakna leh hmangaihna lan chhuahtir ni atan te, Zo hnahthlak hnam hrang hrangte ziarang leh nunphung inhriatpui a, inzahsak chunga inpumkhatna kawng zawh zelna ni atan te hmang turin mipuite chu a chah a. Ṭhenawm ram aṭanga kan unau lo raltlante kan lo dawnsawn leh chhawmdawl dan chu thil lawmawm tak a ni tiin, chhunzawm zel turin District mipuite chu a chah bawk.

Kut Thlengtu Pu David Lalthantluanga chuan Kut hmang tura kal khawm zawng zawngte Kut chibai bukin, duhsakna a hlan a. Kal khawmte chu Chapchar Kut kal tlanga hnam thuam leh zai leh lam mawi tak takte vawng ṭha a, hnam dang hmuhah chhuan tlaka pho chhuak tura chahin, Kut chu ram leh hnam hmangaihna rilru put thartirtu leh mi dang tana malsawmna ni tura intiam thar ni atan hmang ṭheuh turin a chah a ni.

Lawngtlaia Chapchar Kut hmannaah hian CYLA Choir-in Kut hawn nan "Ro Min Relsak Ang Che" tih hla thiam taka sain, BCM Lawngtlai Area Executive Secretary Rev. Dr H. Lalthlamuana chuan hunserh a hmang a. MUP Sub-Headquarters Lawngtlaiin hlado leh bawhhla chhamin tlang an tlir a. Central YLA, LWA General Headquarters, MHIP Sub-Headquarters, Don Bosco School, ANM School Lawngtlai leh DIET Lawngtlai te'n hnam lam chi hrang hrang - ruakkhatlak (cheraw), chawnglaizawn, sarlamkai, pawhloh tlawh, parlam, chheih lam leh lam chawhchawrawih (medley) te entirin, ANM School Lawngtlai zirlaite'n lemchan tawi an entir bawk a. CYLA ai awhin YLA Electric Veng Branch, Lawngtlai te'n Zo hnahthlak hnam hrang hrang thuam an entir a. Lawngtlai pawn lam aṭanga zaithiam lo kal - Sangtei Khuptong leh tualchhung zaithiam - Latei Hringngen, Vanlalzawmpuii Hrahsel, Elizabeth K. Lalbiakhluni, T. Lalhlimpuii leh R. Laldinpuia te'n zaiin kal khawmte an awi bawk.

Organising Committee-in Chapchar Kut Miss 2023 thlan chu Phawngpui Photographers' Association (PPA) kuta a dah angin, PPA chuan Kut hmannaa hnam thuama kal nula nalh zual an thlang chhuak a. Chapchar Kut Miss 2023-ah T. Vanlalzahawmi, Electric Veng, Lawngtlai chu thlan a ni a; 1st Runner Up-ah Daisy Hmingthianghlimi, AOC Veng Lawngtlai leh 2nd Runner Up-ah K. Rinsangpuii, AOC Veng, Lawngtlai te thlan an ni. Hnam thuam inbel naupangte aṭangin Chapchar Kut Little Miss-ah Eunice Lalhriatzuali Fanai (kum 3), Bazar Veng, Lawngtlai leh Little Mister-ah Manase H. Lalrammuanpuia, Council Veng, Lawngtlai te thlan an ni bawk. 

Vawiin Lawngtlaia Chapchar Kut hmannaah hian LADC-a Chief Executive Member Pu V. Zirsanga, Chairman Pu VL Hmuaka leh Executive Member leh MDC-te, state leh LADC hnuaia official leh staff-te, thu thar theh darhtute, tlawmngai pawl hrang hrang ai awhte, khawtlang hruaitute, political party hruaitute leh mipui ṭhahnem tak an kal khawm a. Artui inbarha chhawng hnawtin, Kut lawmna thingpui in ho a ni a. Zai leh lama hlim taka hun hmangin, Working Committee Chairman Pu Abraham Beirazi Khithie chuan lawm thu sawiin Kut hi a khar a ni.

Lawngtlaia Chapchar Kut hlawhtling taka hman a nih theih nana tha leh zung sengtu zawng zawng chungah Kut Organising Committee chuan lawm thu a sawi a ni.

Attachment

  • Loading attachment...