3753/2022-2023

Dated Serchhip, the 3rd March, 2023: Vawiin khan Mizoram chhung hmun dangte rualin Serchhipah Chapchar Kut Leisekawt Muala Kut buatsaih a ni a, Pu Kawlthuama, President Sub- Headquarters YMA chu Kut thlengtu niin Pi Nazuk Kumar, Bawrhsap chu Kut Nu a ni.

Kut thlengtu Pu Kawlthuama chuan, mipuiten hlim taka Kut an hman theih nan an theih ang tawkin an inbuatsaih tih sawiin hlim taka Kut hmang turin a sawm a. Kumina kan kut thupui hi Zofate Inpumkhatna a nih angin mitin thinlung hmun khat pua, inunauna te, intanpui tawn dial dial duhna thinlung te nei thar chunga hun duhawm tak hmang turin a sawm a ni.

Kut Nu Pi Nazuk Kumar pawhin thusawiin, Kut hmang tura kal zawng zawngte chibai a buk a, Mizo pi leh pute khan Chapchar Kut hlim taka an hman theih nan nupaa inrem lohte, chhungkaw hlim tlan loh te, khawtlang dam tlan loh te an hlauva, an inbuatsaih thin. Keini pawhin an tihdan entawnin chhungkua, thenawm leh khawtlangte inrem thar ila, intanpui tawn ila he hunpui hi nuam takin inlawm ang u. Kan pi leh pute nun dan mawi zonun zemawi tlawmngaihna, rinawmna, aia upate zah thiamna te chawi nung zelin, zofate inpumkhatna ngai pawimawh ila. Hnam inthuamna mawi leh mitla tak tak kan neih te, hnam lam leh hla nalh tak tak kan neihte vawnghim tlat chungin khawvel zau zawkah phochhuak thiam ila, kan tu leh fateah pawh nghet taka tuh i tum zel ang u, tiin mipuite a sawm a ni. Khawvela ram mawi leh nuam ber te zinga mi kan nei tih inhriain, kan ram leh a chhunga nungchate, kan ramngawte venhim leh enkawl kawngah pawh i bei sauh sauh ang u. He ram hi nakin thlenga kan tu leh fate chenna tlak ram duhawm leh nuama siam hi kan mawhphurhna pawimawh a ni, a ti a ni.

Chapchar Kutah hian Serchhip khawpui leh a chhehvel khuaa Branch YMA, MHIP leh School thlan bik ten Mizo hnam lam, zai leh thildangte entirna hmuhnawm tak tak an nei a, chawhnu lamah rimawi hmanga intihhlimna buatsaih zui a ni bawk.