3752/2022-2023

Mamit 3rd March, 2023 : Vawiin khan GSA Khelmual, Mamit-ah Chapchar Kut 2023 ropui taka hman a ni a. Pu Lalnunhlua, District Bawrhsap chu Kut pa niin Pu Vanlalchhuanga Chhangte, President, Sub Hqrs YMA Mamit chu Kut thlengtu a ni.

Kut pa chuan Chapchar Kut hmang tura kalkhawmte Kut chibai bukin hrileng avanga kum hnih lai mai kut kan hman theih loh hnua boruak tha taka hnuaia mizote kut ropui Chapchar Kut kan hmang leh thei chu lawmawm a tih thu a sawi a. Mizo tih hian chhinlung chhuak mizo hnahthlak zawng zawngte a huam a, kan pipute chindan tha, taimakna, thawhrimna, tlawmngaihna leh aia upate zahna chhawm kan hriat thara, kan chhawm nun leh zual nan kut hmangtu zawng zawngte a sawm a ni.

Zofate inpumkhatna, kan hnam bil tihdante chhawm nunga nghet taka vuan chung zela, inlungrualna tha tak nena inngeih tlang leh lungruala taka khawsa ho zela, kumin Chapchar Kut thupui Zofate inpumkhatna chu a taka nunpuitu ni theuh turin kalkhawmte a chah bawk a ni.

Kut thlengtu Pu Vanlalchhuanga Chhangte pawhin thu sawiin kan pi leh pute hunlai atangin Chapchar Kut chu hlim leh nuam takin an hmang thin a, inremlohna neite, nupa kara remlohna awmte pawh he kut hian inngaihdamna leh inremna a ken tel avangin, inremna hunah an lo hmang thin a, chutiang tak chuan keini thangtharte pawhin mizo takin hlim lawm taka kut hmang turin kalkhawmte a sawm bawk.

Kumin Chapchar Kut thupuiah hian "Zofate inpumkhatna" tih chu hman a ni.

Mamit-a Chapchar Kut hmanna-ah hian khawpui chhung YMA Branch hrang hrang bakah Govt. Middle School III te'n Cheraw an entir a. Anni bakah hian W. Phaileng Branch YMA te'n Cheraw (Buhza aih) an entir bawk. MHIP Sub Hqrs Mamit hnuaia Branch hrang hrangte atangin Parlam entir niin MCO Sub Hqrs, Mamit te'n Sarlamkai an entir a. Reiek Branch YMA atangin Khuallam entir niin Mamit khawpui chhung Branch hrang hrang te'n Siktuithiang lam an entir bakah Hmar veng Branch YMA chhang atangin Tlanglam entir a ni bawk.

Kut lawmna-ah hian Mizo infiamna chi hrang hrang entir niin Luangpawl Branch YMA atangin Mizawn Inchuh, Chhimveng Branch YMA atangin Insuknawr bakah khawpui chhung vengtin naupangte atangin Pawnto entir a ni a. Hmarveng Branch YMA, Mamit te'n Costume Parade an entir bakah Shingla Valley Jt. YMA te'n hnam lam an entir bawk. MCO Sub Hqrs kaihhruainain Chheih lam leh Chaipui neih anih bakah zaithiamte'n zaiin mipui an awi bawk a ni.

Vawiina Chapchar Kut Mamit-a hmanna GSA Khelmualah hian DAY-NULM hmalaknain Stall hrang hrang 30-ah ei leh in tur lei mai theih phochhuah a ni a. Kut nula leh Kut naupang thlanna neih anih bakah Kut pual thlalak intihsiak neih a ni bawk.

Mamit-a Chapchar Kut hmanna-ah hian Assam atangin Thangram YMA te chuan Kut rawn chhimin, khawpui chhung YMA Branch hrang hrang bakah Shingla Valley Jt. YMA, W. Phaileng Branch YMA bakah Reiek Branch YMA te sawm an ni.