Vawiin chhun dar 12:30 khan Lawngtlai District Legal Services Authority (DLSA) bul tumin Govt Southern Public High School, Lawngtlaiah hna thawka naupang chhawr luih dona ni (World Day Against Child Labour) hman a ni.

He hun hi School Headmistress Pi F.Vanlalhlupuii'n kaihruaiin, hun buatsaihtu Lawngtlai DLSA chungah lawm thu a sawi a. Lawngtlai DLSA atangin resource person Advocate Pu C.Lalrinfela'n hna thawka naupang chhawr luih (child labour) chungchang a zirtir a. Lawngtlai District Information & Public Relations Officer Pu C.Lalhruaitluanga'n thu a sawi bawk.

Resource person chuan 'hna harsa leh hlauhawm thawk tura kum tling lo naupang chawr luih' tihin a huam theih chin te, a khapna dan leh inven dan tur bakah, do tur leh tibo tura thil pawimawh hrang hrang te a sawi fiah a. Hemi chungchanga hriat tur pawimawh zawhna leh chhanna hun hman nghal a ni.

World Day Against Child Labour hi child labour venna leh mipuite tihharhna atan International Labour Organisation (ILO) huaihawtin kum 2002 atang khan kum tin June ni 12-ah hman a ni thin a. Kumin hian Pathianni a nih avangin Lawngtlai District-ah chuan vawiin khan hman a ni ta a ni.

UNICEF-in a chhinchhiah danin, khawvel pumah naupang maktaduai 150 (13%) vel chu hna thawka chhawr luih an ni a. India ram bikah chuan naupang kum 5-14 inkar za zela sawmpahnih (12%) chu hna thawka chhawr luih an ni.