Vawiin hian Serchhip DC Conference Hall ah Department tinte tan,  Disaster Act, 2005 in a phut anga chhiatna lo thlen huna hmachhawn dan tur ruahmanna ( Disaster Management Plan) siam dan zirna leh Tlawmngaipawl, Adventure Club leh Venhimna thawktute tana Chhiatna tawkte chhanchhuahna hmanrua (Disaster Equipments) hman dan zirna buatsaih a ni a, Bawrhsap Dr. Lalrozama, IAS in a hman pui.

A hawnna inkhawm tawi buatsaihah Bawrhsap Dr. Lalrozama chuan, vawiina he thil zir tura thlante hi naktuk atanga Serchhip District chhunga hetiang lam thil midangte hrilh chhawnga zirtir zuitu tura kan beiseite in ni a, a taka chhiatna kan hmachhawn hunah pawh nangni hi kan rawn kohva kan beisei turte in ni, chuvangin thiam ngei tuma theihtawp chhuah turin ka ngen che u a ni, a ti a. Departmental Disaster Plan zir tura kalkhawm Department tin atanga aiawh lokalte pawh an hriat tur thil pawimawh chitinrengte uluk taka zira hriat vek tum turin a chah bawk.

Departmental Disaster Management Plan siam dan chungchang hi DM&R Lunglei District Organiser, Pi Chuaupari'n a lem nena entir chungin a zirtira, Disaster Equipments chi hrang hrang hman dan hi Pu Zothansanga, DM&R District Organiser leh Pu Vanlalhmuaka ten an zirtir ve thung a, zirtuten a takin an tichhin nghal zel bawk a ni.

Management Plan zir tur hian Serchhipa awm Department tin atangin aiawh pakhat theuh an tel a, Equipments hman dan zir tur hian Serchhip Sub Headquarters YMA hnuaia Sub Committee on Disaster member te, Serchhip Kawnpui North leh South YMA hruaitu leh member te, Police Department aiawhte leh Serchhip Adventure Club  member te an kalkhawm bawk a ni.