Vawiin khan Sub-Committee on Quality Control of Cement and Iron Rod chuan Mizorama Cement leh Iron Rod hralhchhuah quality test chungchang leh thenawm state te nena Cement man inthlauh dan sawihovin Committee Chairman Pu Franklin Laltinkhuma, Secretary, FCS&CA pisaah an thukhawm.

He thukhawmah hian mipuiin man tlawm zawka cement leh iron-rod quality tha an lei theih nan leh, Sorkar pawhin heng atanga chhiah a hmuh tur zat dik tak a hmuh theih nana hmalak dan tur sawiho a ni a. Silchar leh Aizawla Cement hralhchhuahna man inthlauhna chhan chu C&F (Carrying and Forwarding) Agent ten Dealer-te an pekna rate a inanloh vang anih thu sawi a ni a. Hei hian mipui leh dealer-te tan harsatna a thlen avangin sutkian dan tur ngaihtuaha company/ supplier-te nen meeting neih leh rel a ni. Quality chungchangah chuan Legal Metrology lamin Cement brand pariat an test tawh atangin a quality a that tawk thu sawi a ni a. India ram puma cement chak zawng tehfung siamtu Bureau of India Standards (BIS)-in cement tehna a siam (standard) an khum vek a ni. Iron Rod zuartute leh an bukna hmarua te hi Sorkarin a phut ang zela regular taka endik a nih thin thu tarlan a ni bawk.