Nimin khan South Sabual-a Reiek Block Handloom Cluster hawnna hun buatsaihah Parliamentary Secretary Pu Joseph Lalhimpuia chu khuallian niin hun a hmanpui a. Bialtu MLA leh ZIDCO Chairman ni bawk Pu Lalrobiaka chu khualzahawm a ni. National Handloom Development Project (NHDP) hnuaia Handloom Training enkawl tur hian Tlangnuam Damveng Handloom Co-Operative Society chu thlan a ni.

Khuallian Pu Joseph Lalhimpuia chuam "Handloom hmangin Zoram tan sum tam zawk lakluh kan tum" a ti a. Puantah chu Mizo nuna bet tlat, intodelhna tura kan theihna leh thiamna pawhin a mil zawng tak a nih thu a sawi a. Industry dangah te leh, buh, thlai leh thei tharchhuahah kawngah intodelhna tluantling a chantir tura hralhchhuah tham kan la neih theih tak tak loh thu sawiin, chutihlai chuan handloom products-ah erawh thiamna tha tak tak kan kawlin, a design leh rawng thlakah pawh khawvel thiamna el pha kan ni thei a ni, Parliamentary Secretary chuan a ti a. Sorkar laipui atangin handloom tichangtlung turin leh hmasawnna tha zawk siam tura project hrang hrang rawn lut a awm bakah Mizoram Sorkar chuan kan puantah te ramdang a hralhchhuah a nih theih nan leh kan puan tawh te chu daih rei leh tha zawk tura sawngbawl dan te a ngaihtuah mek anih thu a tarlang a ni.

Pu Joseph Lalhimpuia chuan kuthnathawktuten an thawrim leh thiam rah an hmuh ngei a duhsak thu a sawi a. Chutihrual chuan tun a Block Handloom Cluster din hi a enkawlzuitu chu mimal emaw pawl kut a dah anih avangin anni pawhin thahnemngai tak chunga hna an thawh zawm a duh thu sawiin, Project enkawltute thawh that leh thalo chu thlithlai an nih tur thu leh, a thawk thalo chuan ngaihven zui an hlawh loh tur thu a tarlang a ni. nih tur thu a sawi a ni.

Khualzahawm Pu Lalrobiaka chuan Handloom Training-na hmun din ani chu Reiek Block leh South Sabual khaw neitute tan a vanneihthlak in eizawnna kawnga malsawna tur anih thu a sawi a. He malsawmna hi chhawr tur chuan a dawngtu mipuiten tih tur kan neih ve tih hre reng a, eizawnna ah mipa thawh chi leh hmeichhe thawh chi thliar lovin, thawhrimna nen intodelh vek tum turin tha kan thawh a ngai a ni, a ti.

Reiek Block Handloom Centre hawnna hunah hian Pi Laltanpuii, Tlangnuam Damveng Handloom Co-Operative Society Chairman leh National Awardee (Women Achiever Award in Sericulture, 2014) ni bawk chuan thu sawiin, kumin April ni 25 atanga training hi kalpui tan a, batch hmasa ber atan mi 20 training pek mek an nih thu leh, South Sabual loneitute chu society a insiamin silk siamna tur Muga plantation lamah nasa taka hma an lak thu a tarlang a ni.

NHDP hi kum 2013-14 khan kalpui tan a ni a. Hemi hnuaia handloom tihhmasawnna kawng hrang hrang zingah Block Level Cluster Development hi a tel a. Mizoramah pawh hmun 7-ah kalpui niin, runah hian 1st Installment hmuh tawh a ni a. South Sabual bik atan a sum dah zat (total project cost) chu chung nuai 231 a ni. Mizoram ah hian Kum 2009-a Sorkar laipuiin census a neih hnuhnun bera a lan danin puantahtu 39,000 chuang awm anga chhinchhiah a ni.

India hmarchhak state abik taka enkawlna project dang Textiles Ministry hnuaia kalpui dang leh chu NERTPS ani a. Hemi hnuaiah hian Industries Department chuan Cluster Development Projecr hmun 17-ah porject cost Rs. 17.44 crore in a kalpui mek a. Sericulture Department pawhin NERTPS hnuaiah vek hian Rs. 31 crore chuang project a kalpui bawk a ni.