Vawiin khan Chief Minister Pu Lal Thanhawla'n Govt. High School Field, Zarkawt ah NLUP 3rd Phase hnuaia Industries Department in NLUP beneficiaries 65 te Auto Rickshaw hlanna programme an buatsaih chu khuallian niin a hmanpui a. He programme ah hian Home Minister Pu R. Lalzirliana; Industries Minister Pu H. Rohluna te bakah Minister dang te, Parliamentary Secretary te, MLA te leh Sawrkar mi pawimawh engemaw zat an tel a ni.

Chief Minister leh NLUP Apex Chairman ni bawk Pu Lal Thanhawla chuan Pathian tel lovin mihringten engmah kan tih theih loh thusawiin Pathian kan lam tanga kan siam a, A Duh dana thil kan kalpui leh kan tih chuan eng programme pawh kan ti hlawhtling thei a, NLUP pawh hi Pathian lamtang programme a ni a, kut hnathawktu, loneitu leh huan neitute hlawhtlinna pawh kan hmuchho mek a ni, a ti a. Ei leh bar, sum leh pai a kan intodelha, khawtlang nun kan siamthat a, Kohhran nun kan tihngheh choh zel chuan Pathian kan chawimawi a, chuvangin Pathianin min hunna theuh hi A rawngbawl tur leh mite tana malsawmna ni tura min dahna a ni tih kan hriat thar a pawimawh hle a ni, a ti a. NLUP avangin tlangram lo neih a tlem phah thu leh Green Mizoram kaltlanga Mizoram a ramngaw siam belh a nih thu a sawi bawk.

Pu Lal Thanhawla chuan Industries Department hnuaia Auto Rickshaw Trade, Petty Trade, Puanthui Trade leh Trade dangte hi thlai leh Trade dangte ang a nghah ngai a ni lova , ei zawnna tling nghal leh eizawn nan a hman theih nghal a, beneficiaries ten rim taka an thawh chuan hun reilo te chhunga a hlawhtlinna rah an seng nghal theih a ni, a ti a. Ist Phase leh 2nd Phase a Auto Rickshaw dawng beneficiaries ten rinawmna, taimakna, dikna leh Pathian tihna nung nen hma an lak avangin hlawhtlinna an hmuh thu Chief Minister hian a sawi a. Chief Minister chuan tun tuma Auto Rickshaw dawngtu NLUP beneficiaries 65 te chu hlawhtling tura a duhsakna hlanin, an chhungkaw dinhmun siam tha a, eizawnna ngelnghet an hmuhna piah bakah an khawtlang theuh a, a mamawhtu leh khawtlang tan malsawmna ni tura chahin beneficaries dangte tan entawntlak ni turin a fuih bawk a ni.

Chief Minister hian Cluster 9 atanga beneficiaries pakhat theuh hnenah Auto Rickshaw document a hlan nghal bawk a ni.

Vawiina NLUP 3rd Phase hnuaia, Industries Department in Auto Rickshaw semna programme an buatsaih hi Pu J. H. Rothuama, Chairman, NLUP Implementing Board in kaihruaiin Industries Department, Director, Pu J. Hmingthanmawia hnen atangin Technical Report ngaihthlak a ni a. Industries Minister Pu H. Rohluna’n lawmthu sawiin programme kharna hun a hmang a ni.

Vawiina NLUP kaltlanga Auto Rickshaw dawngtu te hi Industries Department hnuaia NLUP 3rd Phase a beneficiaries an niin an zavaiin mi 65 an ni a. Cluster 9 a mi niin Lunglei South Cluster atangin beneficiaries 6; Lunglei North Cluster atangin beneficiaries 5; Lunglei West Cluster atangin beneficiaries 4; Lunglei East Cluster atangin beneficiaries 4 ; Serchhip Cluster atangin beneficiaries 7; Chalfilh Cluster atangin beneficiaries 8; Aizawl South III Cluster atangin beneficiaries 8; Tuivawl Cluster atangin beneficiaries 13 leh Tawi Cluster atangin beneficiaries 10 in Auto Rickshaw hi an dawng a ni. Auto Rickshaw pakhat man hi cheng 1,27,695 niin Bajaj Company siam 2 stroke, 150 cc category a ni a, a supply tu hi M/S Standard Motor Works, Aizawl an ni.

NLUP hnuaiah hian Ist Phase ah beneficiaries 69 leh 2nd Phase ah beneficaries 196 ten Auto Rickshaw an dawng tawh a. 3rd Phase leh 4th Phase ah Auto Rickshaw Trade thlang beneficiaries 293 an awm a, chung zinga 65 te chuan vawiin khan Auto an dawng a, beneficiaries 228 la dawng ve lo te pawh hian an dawn ve thuai theih nan chak taka hma lak mek a ni.

Mizoram Sawrkar Flagship programme NLUP ah hian Industries Sector hnuaiah hian main trade 24 leh minor trade 40 zet dah a ni a, NLUP Phase hrang hrang hnuaiah beneficiaries 26914 an awm mek a ni.