3190/2024-2025

Dated Lawngtlai, 26th November 2024 : Vawiin chawhma dar 11 khan Lawngtlai District tana Pradhan Mantri Dahrti Aaba Janjatiya Gram Utkarsh Abhiyan (PM DAJ-GUA) Campaign kal zelah Pu Zoramsiama Hmar, Addl.DC, Lawngtlai kaihhruaina hnuaiah DC Office, Lawngtlai tualzawlah 'Health Camp & Free Clinic' hawnna hun hman a ni a. Dr.Lorrain Lalpeklian Chinzah, Adviser to Chief Minister chuan  'Health Camp & Free Clinic'   hawnna a nei.

Dr.Lorrain Lalpekliana Chinzah, Adviser to Chief Minister chuan 'Health Camp & Free Clinic' hawnnaah hian thu sawiin, Lawngtlaia PM DAJ-GUA kalpui turin  khua-73 thlanchhuah a nih thu tarlangin, he scheme hnuaia za a za hlawhtlinna hmu turin line department hrang hrangte an pawimawh tiin theihtawp chhuah turin a chah a. Lawngtlai District chu zirna lamah a hnufual hle tih tarlangin, Zirna siam tha turin 'Grass root Elimentary Education'  atanga siam that a ngai a ni, a ti. Adviser to Chief Minister chuan hriselna kawnga  hmasawn turin  faina leh thianghlimna lama tan la thar turin a sawm a. PM DAJ-GUA- hnuaia hmasawnna kalpui tur hrang hrang zingah kawngpui leh a kaihhnawih siamthat, buh leh thlai thar lama hmasawnna te, zirna tha a awm theihna tura hmalaknate bakah hriselna kawnga hmasawnna tur hrang hrangte chu ngaihpawimawh zual a nih tur thu a tarlang bawk. PM DAJ-GUA  kaltlanga  Lawngtlai district mipuiten hamthatna an hmuh bakah chhungkua leh khawtlangah  hmasawnna a thlen theih nana hmang  tangkai turin duhsakna a hlan nghal bawk.

Pu Cheemala Siva Gopal Reddy, IAS, Deputy Commissioner, Lawngtlai chuan thusawina neiin PM DAJ-GUA campaign kal zelah vawiin a Dr.Lorrain Lalpekliana Chinzah, Adviser to CM inpekna zara Health Camp & Free Clinic hman  a ni thei chu lawmawm a tih thu sawiin, he hun hmang tura lo kalte hnena lawmthu sawina a nei a. India sawrkarin Tribal- te dinhmun leh mamawh hriain hmasawnna kawng hrang hrangin a kalpui thin a, Mizoramah pawh  Tribal population a sân  hle avangin he scheme tha taka kalpui a nih chuan ram leh hnamin nasa takin hmasawnna a hmu thei dawn a ni, a ti.

He hunah hian Dr. Lorrain Lalpekliana Chinzah chuan mi pahnih hnena Adhaar card hlanna neiin, Pu Cheemala Siva Gopal Reddy, IAS chuan mi pakhat hnenah a hlan bawk.

Vawiin Pradhan Mantri Dahrti Aaba Janjatiya Gram Utkarsh Abhiyan (PM DAJ-GUA) Campaign - Health Camp & Free Clinic hawnna inkhawmah hian Pi Margaret J. Vanlalremmawii, SDO (Sadar) chuan lawmthu sawina neiin hun a khar.