3191/2024-2025

AIZAWL; the 26^th November, 2024: Tukin chawhma dar 10:30 khan, Civil Hospital, Aizawl Sr.Medical Superintendent, Dr.S.T.Lalruatfela  office chamber-ah Ashraya Hastha Trust, Bengaluru, Karnataka ten Civil Hospital, Aizawl hnen a Apheresis Machine  an pek puala (Handover Ceremony)  programme tawite hman a ni a. Pu NK Sharma, Director, Ashraya Hasta Trust chuan Civil Hospital,Aizawl a hman tur Apheresis khawl chu Health Minister Pi Rinpuii hnenah a hlan ta a ni.

He Handover Ceremony-ah hian thu sawiin Pi Rinpuii chuan Associaition for Voluntary Blood Donation (AVBD) leh mimal tlawmngai ten thei tawp chhuahin Blood donation drive hi kalpui thin mahse Kan Civil Hospital-ah te hian thisen indaih tak tak hi a har thin a . Chuvangin Blood bank a thisen te hi inrenchem taka hman a ngai fo thin a ni. kan lo tih thin dan (Traditional method) ah chuan Donor thisena component thenkhat: plasma, white blood cell(platelets) etc.chauh mamawh  heng natna: Thin tha lo, Leukemia, Dengue, cancer etc..tan pawhin donor chuan a thisen kha a ngai ngaia a pek tho a ngai thin a  ni. Apheresis khawl chuan thisen component mamawh chauh a lakchhuah zawhah, alakchhuahna hnu thisen bang zawng kha donor hnenah a pe let leh dawn a ni. Heng bakah hian patient khan mi dang dang thisen a dawn a ngaih tawh dawn loh avangin, natna inkaihchhawn palh thei lakah pawh a him zawk tawh dawn a ni, a ti. Mizoramin Apheresis Khawl kan mamawh zia te hria a, Ashraya Hasta Trust in kan dilna min lo pawmsak hi ka lawm tak zet a a ni, tiin tun hi a tawpna ni mai lo se, hmalam hunah pawh tanpui chhunzawm zel turin Ashraya Hasta Trust te chu a ngen nghal  a. Civil Hopital a thawktu te hnenah pawh fimkhur tak leh dim taka khawl chu hmanga enkawl zui tura chahin, operation leh maintenance-ah buaina a awm loh nan  official ten bawhzui ngai chu a siamtu company lamah lo bawhzui turin a chah hlawm a ni.

Pu NK Sharma chuan Mizoramin a mamawh deuh mai Apheresis khawl Civil Hospital, Aizawl hnena kan pe thei che u hi kan lawm hle a ni. Hetianga ke kan pe theih nan a kawng lo sialtu, Bengaluru-a kum tam tak lo awm tawh leh Kannada tawng te pawh thiam Health Minister Pi Lalrinpuii hnenah pawh lawmthu ka sawi tak zet a ni, a ti.Pu NK. Sharma chuan Ashraya Hasta Trust hi non-profit organization a ni a, India ram state 26-ah kum upa leh tar chak lo zawk te, mirethei leh chanhai te tan hriselna kawngah leh kawng hrang hrangin chhawmdawlna hna athawk mek  a ni, a ti.

He Apheresis Machine hi cheng nuai ₹60/- man vel a ni a.Traditional method-ah chuan patient pakhat Platelets (white Blood cell) pe turin donor 3  mamawh ni ta se, Apheresis khawl hman chuan donor 1 chauh pawhin a pe thei  tawh dawn a ni.