No.7355/2020-2021

Vawiin khan India Republic Day vawi 72-na chu Lawngtlaia Central YLA khelmualah ropui taka lawm a ni a. Lawngtlai Bawrhsap Dr Andrew H. Vanlaldika, MCS, chu Khuallian a ni.

Zing ni chhuah rualin sawrkar pisa leh hmun pawimawh dangah te India hnam puanzar zar a ni a. Zing dar 8:30-ah CYLA khelmualah Khuallianin hnam puanzar pawt pharhin, zahna chibai a buk a, Republic Day thuchah a sawi nghal a ni.

Khuallian Dr Andrew H. Vanlaldika chuan Lawngtlai District mipuite chu Republic Day chibai bukin, India ram Danpui duang chhuaktu ram hruaitu hmasate zahna chibai a buk a. COVID-19 hri leng dona kawnga sawrkar department hrang hrang, LADC leh CADC, kohhran, chanchinbu mi, tlawmngai pawl leh District mipuite thawh hona a that thu sawiin, lawm thu a sawi.

Lawngtlai District chhunga hmasawnna hna thawh hrang hrang tar langin, Bawrhsap chuan District Administration leh District Council te'n thawh hona tha tak an neih thu a sawi a. LADC hnuaia hmasawnna hna thawh hrang hrang zingah NLCPR atanga sikul building 37 sak zawh ni a, a dang sak chhunzawm tura hma lak mek a nih thu te, MDC Area Development Fund leh Excluded Area Fund atanga hmasawnna hna eng emaw zat thawh a nih thu te a sawi.

Bawrhsap chuan District mipuite hrisel nan leh COVID-19 hri leng dona kawnga Health Department hma lakna fakin, District Hospital Lawngtlaiin a kum zawna Kayakalp inelnaa lawmman pakhatna a dawng thei chu District tana inchhuanna tham a ni, a ti a. ANM School-in Mizoram Nursing Council exam-a result tha tak an nei thin leh faina kawnga lawmman dawng khawpa hma an la tha thin chu fakawm a tih thu a sawi bawk.

Bawrhsap chuan District ralmuan nana thawktu District Police-te hma lakna fakin, LADC MDC Inthlanpui, 2020 leh Krismas leh Kumthar vuakvetah te, COVID-19 hri leng dona kawngah te fak tlakin hna an thawk a ni, a ti a. UD&PA hnuaia in sak tanpuina, PMAY - Housing For All-ah Lawngtlai khawpuiin Hmarchhak khawpuite zinga hma la tha, Best Performing Award in Nagar Panchayat-a lawmman pahnihna a dawn thu a tar lang bawk.

Bawrhsap chuan MGNREGA hnuaiah Lawngtlai District-ah job card holder 33,938 an awm mek thu leh kum 2020-21 chhungin ni 77 inhlawhna siam a nih tawh thu a sawi a. Kum 2020 January atanga December chhungin Lawngtlai District-ah nau piang 3,557 leh mitthi 524 chhinchhiah a nih thu te, Lawngtlai District-ah ration card 19,256 (AAY - 2,316; PHH - 8,270; Non-NFSA 8,670) a awm thu leh kum 2021 January ni 22 thlengin Lawngtlai District-ah lirthei 7,439 chhinchhiah a nih tawh thu te a sawi a. KMMTTP kawngpui KM 87.180-a thui sial mekah hna 95.43% zawh a nih tawh thu leh, department hrang hrang kal tlangin hmasawnna hna thawh reng a nih thu a sawi.

Sawrkarin kawng tinrenga mipuite mamawh phuhruk a tum thu sawiin, chu'ng kawngah chuan mipui thawhpuina a mamawh tih a sawi a. Sawrkar department hrang hrang bakah, tlawmngai pawl, kohhran, chanchinbu mi leh mipuite'n District hma sawnna atana district administration an thawhpui thinnaah lawm thu sawiin, la thawhpui leh zel turin a ngen zui bawk.

Kumina Republic Day lawmna hi COVID-19 hri leng vangin kum dang angin hman theih a ni lo va. Sawrkarin a ruahman angin sikul naupang leh mipui nawlpui tel lova hun hman a ni a. Hei vang hian Lawngtlaia Republic Day 2021 lawmnaah pawh hian guard of honour petu Mizoram Police contingent khat chauh awmin, ceremonial parade neih a ni lo.

Thu a sawi zawh hian Khuallian chuan kum 2020-a UD&PA buatsaiha Lawngtlai khawpui chhunga fai intihsiakna hrang hrang lawmman a sem nghal a. Fai Intihsiakna hi hlawm (category) hrang hrangah buatsaih niin, a hnuaia mi ang hian lawmman sem a ni.

1. Restaurant fai:

1) Zero 7 Restaurant & Diner, Bazar Veng, Lawngtlai;

2) B Cafe, Bazar Veng, Lawngtlai;

3) New Adalia, Bazar Veng, Lawngtlai &

MB Restaurant, Chandmary, Lawngtlai.

2. Sawrkar office fai:

1) Land Resources, Soil & Water Conservation office;

2) PWD, Lawngtlai Division office;

3) District Agriculture Office.

3. Educational Institution (Secondary Section) fai:

1) ANM School, Lawngtlai;

2) Govt Lawngtlai College;

3) Govt Region Higher Secondary School.

4. Educational Institution (High School Section) fai:

1) Govt Region High School;

2) Govt College Veng High School;

3) Govt Southern Public High School.

5. Educational Institution (Elementary Section) fai:

1) Southern Standard Middle School;

2) Council Veng Primary School;

3) Bethel Middle School.

6. Veng fai:

1) College Veng;

2) Electric Veng;

3) Chandmary.

Vawiina Lawngtlai-a Republic Day lawmnaah hian LADC CEM charge la mektu Pu T. Lalengmuana, Chairman Pu V. Zirsanga, Lawngtlai SP Pu DKS Singh, IPS te bakah, LADC-a member-te, state leh LADC official-te, ex-servicemen te, political party leh tlawmngai pawl aiawhte leh lawmman dawng turte an tel a. COVID-19 hri leng vangin kum danga neih thin VIP At Home erawh buatsaih a ni lo.

Kumin Republic Day pual hian Lawngtlai District Republic Day Celebration Committee chuan District Hospital Lawngtlai, Christian Hospital Lawngtlai, Lairam Christian Medical Centre & Hospital, Lairam Motherless Home leh District Jail-ah te tanpuina Rs 2,000/- theuh an hlan a ni.