No.7354/2020-2021

Vawiin India Republic Day Vawi 72-na chu chawhma dar 10:30 khan Hnahthialah DC's Office Complex-ah head of offices te, khawtlang hruaitu te, NGO hruaitute leh media mite bakah sawm bik mi tlemtein an hmang a, District Bawrhsap Pu Vanlalmawia chuan khuallian niin Hnam Puanzar a pawt parh a, 2nd Battalion MAP te Hnam Puanzar chibai buk a chhang let a ni.

Khuallian District Bawrhsap Pu Vanlalmawia chuan thu sawiin India Republic Day Vawi 72-na lawmna huna kal zawng zawngte leh Hnahthial District mipuite chibai bukin duhsakna a hlan a. He ni ropui tak lawm mek lai hian India zalenna atana nasa taka beitute leh an nun hlantute chawimawi an phu tak meuh a, India Hnampa Mahatma Gandhi te, Pandit Jawaharlal Nehru te hruaitu dang ropui tak takte avangin India ram chu tih zalen niin mahni puala Constitution siam hmangin Republic a lo ni thei ta hial a ni a ti. Ram hmasawnna leh mipui vantlang nun atana pawimawh hmasa em em chu boruak tha leh ralmuang hi a ni a. Tun kum liamta chhungin, buaina leh harsatna lian tham nei lutuk lovin Hnahthial District a kal thei a, hetianga boruak muanawm tak kenkawhna kawnga mawhphurtu- Magistrate te, Police te, khawtlang hruaitute leh NGO hrang hrangte thawh rah a ni a. A bik takin Mizote Hunpui, Krismas 2020 leh Kumthar 2021 te pawh boruak muanawm tak hnuaiah hman zawh a ni kha a lawmawm tak meuh a ni a ti a. Hemi kawnga thawktute zawng zawng chungah lawmthu a sawi a, boruak muanawm tak nei zel tura tan la zui zel turin a sawm bawk a ni.

Hripui Covid-19 avanga harsatna thleng chungchang pawh sawiin he hri laka Mizoram mipuite an him theih nana nasa takin Mizoram Sorkarin hma lain, Hnahthial District chhungah pawh nasa takin mawhphurtu ten hma an la a. Heta hmalatu, District Level Task Force te, Village Level Task Force te, District Administration, Police, Health & Family Welfare, Sorkar Department leh NGO lama hmalatute an fakawm tak meuh a ni. Chutianga tangrual taka hmalakna avangin Covid-19 hri darh tur nasa takin ven a ni thei a, thla 10 vel chhunga Covid-19 dona kawnga Mizoram Sorkar hmalakna leh mipuite thlawpna hi a fakawm tak meuh a ni a ti bawk.

Bawrhsap chuan district chhunga department hrang hrang District Administration te, District Police (DEF) te; Health & Family Welfare te; Social Welfare & Tribal Affairs te; Environment, Forest & Climate Change Department te; Public Works Department te, Public Health Engineering Department, Power & Electricity Department, Agriculture Department, Horticulture Department, Integrated Training Centre , KVK , AH & Vety Department, Fisheries Department, Sericulture Department, Land Resources, Soil & Water Conservation Department, Food, Civil Supplies and Consumer Affairs, Urban Development & Poverty Alleviation Department, Land Revenue & Settlement Department; Rural Development Department, School Education, Higher & Technical Education department hmasawnna hrang hrangte a tarlang bawk a ni.

Republic Day lawmnaah hian Faina kawnga inelna chi hrang hrang lawmman sem a ni a, Newspaper Editor Faina Thuziak tam leh tha ber-ah Calathea Daily Newspaper thlan niin; 3 Minute Video-Making Competition lawmman te, Photo Challenge te, Slogan Writing Competition te, Drawing Competition te; Banner Competition te, Wall Painting te, Hotel Fai te, Restaurant Fai te, Office/ Department Fai te, School Institutions Fai te, V/C Area fai lawmman te semchhuah nghal niin Hnahthial Officers' Club (HOC) ten Hnahthial tihmingthatu Pi Vanlalhliri Sailo, Headmistress, Govt. High School, Hnahthial State Award for Teacher chawimawina dawngtu chawimawina hun an hmang bawk a ni.

Republic Day lawmna hun hman zawh hnu hian ‘VIP's At Home’ pawh hlung taka hman a ni bawk.