No.7353/2020-2021

India Republic Day champha vawi 72-na chu hmun dangte rualin vawiin khan Govt. Saitual College tual zawlah lawm a ni a, Saitual District Bawrsap Pu V.L.Hruaizela Khiangte chuan chawhma dar 10:00 ah Hnam Puanzar a pawt pharh.

Khuallian chuan khawvela demoracy ram lian ber India ram ropui takin ram Danpui a neih champha vawi 72-na a lo thlen hian he ni hmang tura kal zawng zawngte Republic Day chibai a buk tih sawiin, kum dang anga he ni hi ropui taka lawm phu a nih rualin hripui leng karah sawrkar kaihhruaina zawm chungin Republic Day lawm theih a ni chu lawmawm a tih thu a sawi.

Khuallian chuan Saitual District hmasawnna kawng hrang hrang sawiin District dangte aia a hnufual bik loh nan theihtawp chhuah a ni, a ti a. District function tir, kum khat awrh chauha upa a nih avangin hmasawnna kawng zawh tur a la thui hle a, chutih rualin Chief Minister zahawm takin tunhnaia Saitual KVI rama District Bawrhsap Office Lungphum a phum te, District Horticulture Office hawn te leh Keifang GAD rama SP Office hmun awm thei turte chu thil chhinchhiah tlak tak a ni a ti a. Mizoram District khawpui fai inelnaa Saitual Town-in lawmman pahnihna leh a pumpuia lawmman 3-na a la thei chu DUDO, Town Sanitation Committee leh khawtlang tanrualna lo lang chhuak a ni a ti.

Khuallianin Sawrkarin hmasawnna hnathawh a sawi zingah UD& PA in PMAY-Housing for All hnuaia In 688 sak turah 1st Installment chhungkaw 312 hnena pek a nih tawh thute, Saitual PWD Division hnuaia Khanpui-Tualbung Road 25.00Km formation cutting leh Phullen-Luangpawn Road 5.6 Km Blacktop hnathawh leh Saitual-Phullen inkar Tuivawl lei metre 55 a thui dawh zawh a nih thu te, Saitual District Hospital hnuaiah Sub Centre 8 leh Health Clinic 5 a awm mek thu te, Economic & Statistics Department hnuaia District Research Office hawn mai tura ruahman a nih thu te, PHED, Saitual WATSAN hnuaia Vanbawng Water Supply Scheme atan cheng nuai 214.10 sanction a nih thu leh hmalakna dang Khuallian Pu VL.Hruaizela Khiangte  hian a tarlang a ni.

Khuallian hian Saitual Town huam chhunga fai intihsiakna lawmman category hrang hrang siama lawmman latute hnenah chawimawina thuziak leh sum fai a hlan nghal bawk a ni.

Kumin Republic Day lawmnaah hian kumdang angin  Ceremonial Parade-a awm lo a, Mizoram Home Guard Band Party ten Hnam hla rema Hnam puanzar zahna chibai an buk chu Khuallian hian a chhang lêt a ni.

Republic Day lawmna neih zawh chhun dar 12-ah Republic Day Celebration Committee atanga ruat bikten Saitual Damdawi In leh Hlimna In (Girls Home) ah Republic Day lawmna thilpek an hlan a. Chumi zawhah ‘VIP’s At Home’ Bawrhsap Bungalow-ah neih zui niin Bawrhsap Bungalow sak thar chu Saitual District Bawrhsap Pu V.L.Hruaizela Khiangte chuan a hawng nghal a ni.