Tukin (26.08.2016) zing dar 7 khan Lawngtlai District atanga Industries Department hnuaia NLUP 3rd Phase dawngtute hnenah tanpuina 2nd instalment chu AH & Vety Minister Pu C.Ngunlianchunga’n a sem.

Minister Pu C.Ngunlianchunga chuan sawrkarin mi rethei leh pachhiate ngaihsakin, an din chhuaha lei rem an rah leh theih nan NLUP chu a duang tih a sawi a. A dawngtute pawhin sawrkarin a duan dan ang taka din chhuahpui thei ngei turin hma la se a duh thu a sawi. Hlawhtling tur leh ding chhuak turin thawh rim leh teirei peih a ngai tih sawiin, tanpuina dawng ve si a, a hmanna tura hmang lo chu hlawhtling tlak an ni lo va, eng ti kawng maha siam theih an ni lo vang, a ti. Sawrkar chuan NLUP 3rd Phase tanpuina chu 3rd instalment leh 4th instalment thlengin a la pe dawn a; a chhunzawm nan New Economic Development Policy (NEDP) a duang bawk tih sawiin, NEDP chu ‘tanpuina ni lova tang puihna’ a nih dawn avangin, a taka hna thawk peih lote tan chuan beisei chi a ni lo vang, a ti bawk.

NLUP tanpuina 2nd instalment semna hun hi Lawngtlai Sub-Divisional Industries Office-ah buatsaih niin, SDIO Pu C.Dokulha’n a kaihruai a. Beneficiary mi 213 hnenah tanpuina hi pek a ni a; he’ng beneficiary-te hi dawrte siam, agarbati kuang siam, motor chhe siam, puanthui, lumeh, beauty parlour, buhden, thlalak, electronic repairing leh desktop publishing thlangtute an ni.

Tanpuina hi puanthui thlangte tana khawl leh pawisa fai pek tih loh chu mi pakhatah Rs 50,000/- (singnga) zel pek niin, a zavaiin Rs 1,03,13,760/- (nuai za pathum singkhat sangthum zasarih leh sawmruk) sem chhuah a ni a. Hemi atang hian Rs 68,35,760/- (nuai sawmruk pariat singthum sangnga zasarih sawmruk) chu a sum faia hlan niin, Rs 34,78,000/- (nuai sawmthum pali singsarih sangriat) chu bank kal tlangin account transfer hmanga pek an ni.

Minister hi LADC-a Executive Member panga – Pu C.Lalneihkhuma i/c Education (P/S), Pu T.Zakunga i/c Revenue, Pu KC.Malsawmdawngliana i/c Forest, Pu C.Sangchhunga i/c Agriculture leh Pu Laltlawmlova Chinzah i/c Education (M/S) te bakah, sawrkar official leh chanchinbu mite’n an tawiawm a. NLUP dawngtu beneficiary-te pawh an kal tha hle.