Vawiin (26.08.2016) khan Kan Ram Le Miphun Caah WhatsApp Group buatsaih ‘Lai Hmakhua Atana Inrawn Khawmna’ (Consultation on Making Lai Future) chu SSA BRC Hall, Lawngtlaiah hman a ni a. AH & Vety Minister Pu C.Ngunlianchunga’n a hmanpui.

Khuallian Pu C.Ngunlianchunga chuan ram leh hnam din chhuahna tur chuan rilru puthmang (mindset) dik neih a tul, a ti a. Sawrkar hma lakna tha fak duh loh va, sawiselna tur zawn tlat te; NLUP dawn a hmanna tura hman loh va, ei ral mai mai te; sawrkar hna thawk tan office kal tlai a, ban hma leh viau si te hi kan rilru puthmang dik lo lan chhuahna a ni a, sim vat a tul a ni, a ti. Ram siamna atana zirna pawimawhzia sawiin, hmasawn zel tur chuan zirna siam that beihpui thlak a pawimawh hle ang, a ti bawk.

Hlawhtling tur chuan taihmak a pawimawh a, mi taima awm khwmna ram chu a changkang lo thei lo tih sawiin, Khuallian chuan rinawmna, dikna, huaisenna leh taihmakna nen ram siam hna thawh tur a ni, a ti a. Lawngtlai chu ram dang nena insumdawn tawnna kawng pawimawh tak a la nih dawn avangin ram leh hnam tana tuar huam mi kan nih loh chuan ram dang thu hnuaiah kan awm mai a hlauhawm a ni, a ti.

He inrawn khawmna hun hi chawhma dar 10-ah tan niin, nilenga hun hman a ni a. Chawhma lam hun hi Convener Pu T. Zakunga, LADC-a Executive Member ni bawkin a kaihruai a. Paper panga – “Lai Hnam Tobul leh Hmasawn Dan” (Salai R. Lahnim), “Lai Hnam Dinhmun leh Inrelbawl Dan” (Rev. Michael Rualzakhuma), “Rah Behte Dinhmun leh Beih Let Dan” (Fc.Lalmuanpuia), “Hnam Angin Kan Ding Chhuak Thei Ang Em?” (Rev. V.Suikharliana leh B.Lalnunzawmpuia) tih te zir ho a ni a. Sawi hona hun buatsaih a ni bawk.

He hunah hian LADC-a MDC eng emaw zat an tel bakah, Group member leh Lai hnam tana mi thahnem ngai tak tak te, zaithiam leh thu thar theh darhtute an tel bawk.