Vawiin khan Lawngtlaia damdawi in pathum leh ANM School, Lawngtlaia thawktu leh zirlaite'n khawvel pum huap nurse-te ni (International Nurses Day) 2019 chu LADC Conference Hall-ah a huhovin an hmang a. Lawngtlai BDO Pi Caroline LB Khiangte chuan Khuallian niin a hmanpui.

Pi Caroline LB Khiangte chuan Lawngtlaia nurse hna thawk mekte leh chawl tawhte nena International Nurses Day an hmang ho thei chu lawmawm a tih thu a sawi a. Nurse hna chu hna zahawm leh ropui, missionary hna a ni a, damlo ṭanpui ngaite lo dawngsawng hmasa bertu an nih avangin mihring nunna, thih leh dam chungchangah pawh mawhphurhna lian tak an nei a ni, a ti a. Nurse-te chu chhungkua, khawtlang leh ram thianghlimna, hriselna leh changkanna kawnga mi dangte zirtirtu leh hmahruaitu ni zel turin a chah a. Nurse-te chu damlote taksa mai ni lo, an rilru damna pawh thlen theitu an ni tih sawiin, thutiam (Pledge) ropui tak an neih chu zahawm taka vawng tlat a, nunpui turin a chah.

Vawiina International Nurses Day hman hi District Hospital Lawngtlaia Assistant Nursing Superintendent Pi Lalhlimpui'n a kaihruai a. Lairam Christian Medical Centre-a Nursing Superintendent Pi Lalfinengi'n hunserh a hmang a. ANM School Lawngtlai Principal Pi Rothangpuii'n International Nurses Day 2019 thupui, "Nurse: A voice to lead (Health for all)" tih hmangin thu a sawi bawk a. Chawhnu lamah intihhlimna chi hrang hrang nen hun hlimawm tak hman chhunzawm a ni.