Tunlaia Mizoram chhung mai bakah Mamit District chhunga puang mek  Vaimim eichhetu pangang (Fall Army Worm) chu Mamit District Agricultural Department hmalaknain a damdawi hmanga tihrem/tih thih mek zel niin, Lo/Leipui thenkhata Vaimimte chu lo chawrno tha lehin an nung tha leh a ni.

FAW hian Vaimim zik ei chhumin a hnah a lo ro tran thin a. FAW-in a ei chhiat Vaimim chingtute hi an lo/Leipuiah kalchilhin Pi Lalthangpuii, Mamit Hmunsam leh Pi Vanlalruati, Lungsir-te biangbiakna neih a ni a, an Vaimim eichhetu  pangang chu ni hnih khatah lo pumpui deuhthaw-a Vaimim chu a lo ei chhiat thu an sawi, zing lama pangang pakhat awmnaah hian tlailamah chuan pathum pali vel a lo awm hman thu an sawi. Agriculture Department leh District Bawrhsap-te'n a hmuna kalchilh a, damdawi a thlawn veka an pek an hman chu an lawmthu sawiin an Vaimimte pawh a lo chawrno leh tak thu an sawi a ni.

District Agricultural Office chuan Vaimim eichhetu pangang thah nan hian District Agricultural Office chuan rannung thahna hlo, insecticide chi hrang hrang 10 pawlhin an hman thu an sawi a,damdawi chu ni 10-15 ral hma chuan mihring ei atana a him loh thu sawiin, Vaimim mai bakah a bul vela thlaite pawh ei, lei leh zawrh kawngah mipuite fimkhur turin an ngen a ni. Ni 15 hnuah erawh mihring tan engmah hlauhawm a awm tawh loh thu an sawi bawk.