4560/2024-2025

Lawngtlai, 6th March 2025 : Vawiin chawhnu dar 1:30 khan District Hub for Empowerment of Women (DHEW) Under Mission Shakti, DPO (WCD) Office, Lawngtlai leh Cultural Committee, Government Lawngtlai College tangkawp buatsaihin 'International Women's Day 2025' lawmna Auditorium, Government Lawngtlai College - ah neih a ni.

Pu Z. Laldinhuala , Specialist Financial Literacy (DHEW) D.P.O, WCD, Lawngtlai chuan 'Recognizes Women's Contribution' tih thupui hmangin zirtirna hun a hmang a. India ram baka Mizoram Hmeichhiaten ram leh hnam tana an thawh nasat zia te, Hmeichhiate dinhmun chawisang tura hmalakna hrang hrang, Mipa leh hmeichhiate intluktlanna,  Zirna, eizawnna  leh infiamna kawnga hmeichhiaten  hlawhtlinna an neih te  bakah Danin hmeichhiate a humhalh dan  kawng hrang hrangte zirho a ni.

Pi PC. Lalchhandami, Secretary, LWA, College Veng Branch chuan Pi leh pute hun ngaihtuahin hmasawnna hrang hrang hmuh theiha hmeichhiate  dinhmun a sang ta hle chu lawmawm a tih thu sawi a.  Kohhran leh khawtlangah pawh nihna pawimawh tak tak hmeichhiaten  an chelh  chu a ropui hle a ni, a ti. Hmeichhiate dinhmun chawisang tur leh an dikna chanvo humhalh tura sawrkarin Dan tha tak tak a siam chu hmeichhiate tan vanneih thlak a tih thu a tarlang.  Pi C. Ralkapchhungi, Vice President, MHIP College Veng Branch pawhin thu sawina neiin, chhungkua bakah  khawtlang hmasawnna turin hmeichhiaten theihtawp an chhuah thu a tarlang a. Khawvel leh India ram hruaitu zingah hmeichhia an awm ta fo chu lawmawm a tih thu a sawi a. Mizoramah pawh  ram hruaitu zinga hmeichhe hming lam tur a awm ta fo chu thil chhinchhiah thlak tak a nih thu sawiin, hmasawn zawnga ke pe zel turin hmeichhiate a sawm nghal bawk.

Pu R. Lalrinfela, Asst. Professor Lawngtlai College, chuan  'Zo nun ze mawi ' tih thupui  hmangin thusawina a nei a. Hawihhawmna nei turin nun leh tawngkamah midangte tana hnawksak lo tura nun hman a pawimawh hle a ti. Aia upa leh nu leh pate zah kawngah hmasawn tura  kalkhawmte sawmin,  Hawihhawmna hian mi puitlingah minsiam thin tih chu reng turin a chah. Dikna leh rinawmna kawngah pi leh pute nunah entawn tur a tam hle tih tarlangin, Pu R. Lalrinfela chuan thangtharte chu Zo nun zemawi vawng nung  zel turin a fuih nghal bawk.

Vawiin 'International Women's Day'  hmannaah hian Pi A. Lalawmpuii,Thingkah, Rickshaw hmanga eizawng mek, Mizorama  hmeichhe Auto Rickshaw Driver   hmasa ber  hnenah chawimawina 'Memento'  hlan a ni bawk.

Pu Remlalnghaka, Vice Principal, Govt. Lawngtlai College chuan kalkhawmte lawmna thu sawiin, Lecturers, Zirlai naupang, WCD bakah  LWA leh MHIP aiawhte an kal thei a. Pi F. Lalengvari,DMC- DHEW, DPO(WCD) Office, Lawngtlai chuan lawmthu sawina neiin hun a khar.

International Women's Day- hi kum tin March ni -8 ah  thupui thlan bik neia hman thin a ni a, kumin bikah chuan  Inrinni a nih avangin vawiin  hian hman a ni. Tun kum thupui atan  hian  "Accelerate Action" tih hman a ni.