4559/2024-2025

Aizawl, March ni 6, 2025: Vawiin khan Sipai lammual ah EF&CC Minister Pu Lalthansanga hovin Chapchar Kut 2025 hun khatna hman a ni. Kumin Chapchar Kut ah hian Aizawla a lawmna pui ber chu ni hnih chhung hman tura ruahman niin, vawiin a ni khatnaah hian EF&CC Minister chu khuallian niin, a ni hnihna (7.3.2025) ah Kut Pa Mizoram Chief Minister hova hman a ni ang.

Khuallian chuan Chapchar Kut kan hman chhoh zelah Zonun Zemawi hrang hrang chawisang tura thupui thlan a ni thin chu lawmawm a tih thu sawi a. Mizoram leh khawvel hmun hrang hranga Zofate chuan mahni awmna hmun theuhva zonun zemawi nunpui a, chawisang zel tur kan ni a ti. Kan bulhnai ami te chungah hawihhawmna lantirin, kut ropuina leh hlutna pholang zel turin mpui a sawm a ni. Minister chuan kan ram thil neih hlu leh hmun tha te hi neitu thinlung pu a kan enkawl thiam a pawimawh a ti bawk.

Vawiin programme ah hian CYMA Vice-President Prof. Lalnuntluanga chuan thuhma neiin, Prof. Malsawmliana, Chapchar Kut Organizing Committee chuan kalkhawmte lawmna thu a sawi a. Kumin Chapchar Kut lawmna atan hian a bik takin Mizoram pawn atangin Manipur Group YMA, Tripura Group YMA , Shillong Group YMA, Halfong Branch YMA leh Tlangram Indigenous People hruaitute sawm an ni a. Lam entir turin  Pang Cultural Troupe, Paite Cultural Troupe, Bawm Cultural Troupe, Hmar Cultural Troupe, Nagaland Cultural Troupe (NEZCC kaltlangin) leh Fiji atangin cultural troupe (ICCR kaltlanga) sawm an nih thu a puang.

Vawiin proramme ah hian zaipawl, malzai leh hnam lam hrang hrang sak a entir a ni. Naktuk Chapchar Kut lawmna programme hi chawhma dar 10:30 a tan tur a ruahman a ni a. Sipai Lammual programme bakah hian Lammual atanga Vanapa Hall inkar kawngah ei tur leh thawnhmaw zawrhna stall engemawzat hawn a nih bakah Vanapa Hall ah Art & Photo Exhibition buatsaihin a en theih reng a. Aijal Club park ah Flower Show buatsaih a ni bawk.