Vawiin khan Lawngtlai DC Conference Hall-ah Lawngtlai khawpui chhunga VC leh Consumer Association hruaitute tan sms, telephone leh internet hmanga LPG hauh (book) theih dan zir hona buatsaih a ni a. Election Officer Pu Lalrinawma MCS chuan he hun hi a hmanpui. 

Pu Lalrinawma chuan Digital India kalpui chhoh mekah sawrkar chuan awlsam taka internet hmanga thil tih dan a duang thar zel a, mipuite'n mahni in lum atanga thil kan tih mai theih tam tak a awm tawh tih sawiin, hemi mil hian kan inher rem ve zung zung zel a ngai a ni, a ti a. Hemi kawnga sawrkar hma lakna a hlawhtlin nan chuan mipuiin kan hriat chian a, tha taka kan zawm a ngai a ni tiin, mipui zirtir tur chuan VC-te an pawimawh hle a ni, a ti a. Digital India hnuaia thil tih thar reng rengah Aadhaar No phut a nih zel tawh avangin, mipuiin harsatna kan tawh loh nan Aadhaar neih kim thuai kan tum a pawimawh a ni, a ti bawk. 

He hun kaihruaitu Lawngtlai DCSO Pu Spencer Vanlalchhuanga chuan online booking chu district headquarters-ah chuan tih vek tawh tur a nih laiin, Lawngtlaiah chuan Agency lamah buaina a la awm avangin kan la inpeih thei lo va, rei lo teah tih theih thuai tum a ni, a ti a. Chumi tur chuan mipui kan lo inhmakhua a tul hle a ni tiin, chu vanga VC-te pawh koh khawm an nih thu a sawi. 

Vawiina zir hona hun buatsaihah hian expert-te'n online refill booking chungchang an zirtir a. Zawhna leh chhanna leh sawi hona hun hlawkthlak tak hman a ni bawk. 

Sub-Committee of the Consumers Advisory Committee on LPG-in a rel angin June ni 19, 2017 atang khan Aizawl khawpui chhung, district headquarters leh khawpui lian zualah te chuan online booking hi hmang vek tawh tura ruahman a ni a. Hemi vang hian gas la tura rei tak tak intlar te, subsidy chungchang pawisa kal sual leh to tak taka gas lei leh hralh (black-marketing) pawh ziaawm tura beisei a ni. Online refill booking hi sms emaw, telephone hmang emaw internet hmang emawin a tih theih dawn a ni.