No.1318/2021-2022

Lawngtlai, Vawkhniahzawn thla ni 9, 2021: Vawiin khan Lawngtlai Bawrhsap Dr Andrew H. Vanlaldika chuan a pisaah Lawngtlai District chhunga phone leh internet service provider pathum - BSNL, Airtel leh Jio ai awhte ko khawmin, Lawngtlai District-a phone leh internet service tihchangtlun dan tur leh hmachhawp an neihte a sawipui.

Bawrhsap chuan khawvel hmasawnnain a ken tel leh COVID-19 hri leng boruakin a nghawng chhuah avangin tun laiah online-a tih ngai a tam hle tih sawiin, internet connection tha mamawhna a sang hle a ni, a ti a. Thu pawimawh sawi ho nan leh sawrkar hna hrang hrang thawh nan te, zirlaite zirna chungchangah leh sumdawnna leh mimal chet velna kawng tinrengah internet connection neih that a pawimawh a, he'ngah hian Lawngtlai District a hnufual bik loh nana internet connection tha chhawp chhuah chu Lawngtlaia internet service provider-te mawhphurhna a ni tih sawiin, service provider-te chu tan la deuh deuh turin a chah a ni.

He hunah hian service provider-te'n harsatna an tawh hrang hrang sawiin, an dinhmun leh hmachhawp an neihte an tar lang bawk a. Lawngtlai District-a phone leh internet service rin tlak leh changtlung zawk a awm theih nana hma lakna turte sawi ho a ni.

BSNL chuan signal an dawn ang angte tha takin an pe chhuak thei tih sawiin, consumer-te'n harsatna an tawh chu complain an dawn rualin an enfiah nghal thin thu an sawi a. Bill pek chungchangah thla khat pek loh chuan connection-ah harsatna a awm nghal zel avangin consumer-te'n a hun taka bill pek a pawimawh thu tar lan niin, bill pek that chuan plan angin connection pawh a tha pangngai viau tih tar lan a ni.

Airtel lam chuan Lawngtlai District khawthlang lamah Airtel service tichangtlung turin tower din belh leh thuam that kawngah hma an la chho mek tih an sawi a. Lawngtlai khawpuiah pawh service tichangtlung tura hma lak reng a nih thu leh, Circuit House bulah tower thar din tura hna pawh kalpui mek a nih thu an sawi.

Jio lam pawhin Chawngte atanga Lawngtlai khawpui chhunga fibre hmanga network pawh luh mek chu NH-54 kawngpui dungah Hrangchalkawn atanga pawt tawh turin hma lak mek a nih thu sawiin, kumin chhunga hna zawh fel hman beisei a nih thu leh hei hian Lawngtlaia Jio service a tihziaawm beisei a nih thu an sawi ve bawk.

He hunah hian phone leh internet service chak leh rin tlak zawk a awm theih nan service provider-te chu a theih chin chinah an khawl hlui leh hrui hlui te a tha zawka thlak (upgrade) tuma hma la turin ngen an ni a. Cable hman tawh loh, hluihlawn a awm chuan senghawi zung zung a, hrui thlun tharte pawh khawpui titawp lo leh hnawksak lo zawnga thlun zel ni se, tih a ni.

He hunah hian Lawngtlai khawpui a lo felfai a, a lo thianghlim zawk theih nan Bawrhsap hma laknain khawpui chhunga hrui inzam hnawk lutuk then fai hna thawh tum a ni tih tar lan a ni a. Hemi atan hian DC office chuan hma lak dan tur an duang ang a, chumi zulzui chuan khawpui chhunga hrui inzamte chu a neitu (phone, internet leh Cable TV service provider)-te nen en felin, VC leh YLA-te phungbawmah sawmin cable hlui senghawi leh thlun that hna hi kalpui tum a ni.