Vawiin khan National Tobacco Control Programme (NTCP), Lawngtlai District huaihawtin Information & Public Relations (I&PR) Department, Lawngtlai District staff leh Mizoram Journalists' Association (MJA), Lawngtlai District member-te pualin Lawngtlai Press Club-ah vaihlo leh a kaihhnawih khuahkhirhna dan "Tobacco Controls Laws" chungchang zir hona (training) buatsaih a ni.

Lawngtlai District I&PR Officer (DIPRO) Pu C. Lalhruaitluanga chuan training khuhhawnna thu sawiin, MJA member-te puala training buatsaih chu mi dangte zirtir chhawng thintu an nih avanga a hlawk leh zual thu a sawi a. Journalist-te'n chanchinbu leh hmanraw dang hmanga khawtlang nun siam that rawng bawl hna an thawh chu mahni intuai thar chunga chhunzawm zel turin MJA member kal khawmte chu a sawm a. Nun hrisel leh thianghlim nei turin vaihhlo leh vaihlo atanga thil siam zuk leh hmuam lakah inthiar fihlim a pawimawh a, Mizo mipui nawlpuiin mahni intihhlum, tual thah leh pawngsual te kan duh lohva kan dem viau laiin, puipunna hmun leh mi zingah ualau taka meizial zuin, zawi zawiin mahni leh chhehvela mite nunna kan chhatin an invawn thianghlimna kan tibawrhbang thin tih kan ngaihtuah a, kan pawm ngam a hun tawh a ni, a ti.

Lawngtlai District MJA President Pu ZD Dengngura pawhin MJA-te tana intuai hriamna tur training buatsaih chu lawmawm a tih thu sawiin, mahnia hriat mai duh tawk lo va, a zawm leh mi dang zirtir chhawn lama chhunzawm turin training tura kal khawmte a chah a. Zuk leh hmuam tih nasat chungchangah, nghei thei lo tan pawh mahni taksa tichhe khawpa tih chu mi a thuamhnaw, thil nung leh thahrui nei pawh ni lo inbawih behtir chu mi chak lo zia a ni, a ti.

He training-ah hian Lawngtlai District NTCP-a Social Worker H. Vanlalmuansangi chuan vaihlo leh a kaihhnawih khuahkhirhna dan "Cigarettes and Other Tobacco Products Act (COTPA), 2003" chungchang a zirtir a. He danin a tum leh tih tur leh tih loh tur a tar lan te, dan bawhchhetute hrem theihna hrang hrangte PowerPoint presentation hmangin a sawi fiah a. Hotel room 30 chin awmna, restaurant seat 30 chin awmna leh thlawhna tumhmun (airport)-ah te chauh mei zukna hmun bik (smoking zone) siam theih a nih thu te, Lengpui Airport chu mei zuk phal miah lohna (smoke free) airport a nih thu te sawi langin, Kohhran leh tlawmngai pawl te'n inkhawmpui leh tihpui nikhuaa mei zukna hmun "smoking zone" an siam ve leh ringawt thin chu dan phal loh, chin zui zel chi loh tak a nih thu a tar lang tel bawk.

NTCP Lawngtlai District hi kar tin tum hnih vel phal lohna hmuna mei zu vai leh COTPA dan bawhchhia dawrkai leh thil zuar dap chhuakin an thawk chhuak thin a. Lawngtlaia sawrkar hna thawk thenkhat, tlawmngai pawl ai awh leh thu thar theh darhtute telna Anti-Tobacco Squad din niin, a khat tawkin squad drive neia thawh chhuah thin a ni bawk a. Hei bakah hian sikul, kohhran leh tlawmngai pawl zingah te vaihlo that lohzia zirtirna (awareness/training) an kalpui reng bawk a ni.