No.3903/2021-2022
Aizawl Ramtuk thla ni 4, 2022: Vawiin khan Lawngtlai Bawrhsap Dr Andrew H. Vanlaldika hovin a office chamber-ah Lawngtlai District chhunga khaw hrang hranga COVID-19 hri hluar dan atanga zone thliar dan tur sawi ho a ni.

Bawrhsap Dr Andrew H. Vanlaldika chuan Mizoram sawrkara Health & Family Welfare Department-in January ni 31, 2022-a "Operational Guideline for Containment and Surveillance Plan for Third Wave of Covid-19 in Mizoram" a tihchhuah zulzuia Lawngtlai District chhunga hri kai awmna khua leh veng tina hri hluar dan leh a kai an pun chak dan azira hri kai hlauhawm dan chi thum - green zone, orange zone leh red zone-a thliar dan tur sawi ho tura meeting chu koh a nih thu a sawi a. Sawrkarin inkaihhruaina a tihchhuah zul zuia tehna hrang hrang hmanga thliar fel dan tur sawi ho zui niin, zone hrang hranga thliar fel hnua hri darh zel tur ven nana hma lak zui dan tur te pawh sawi ho nghal a ni bawk.

Operational Guideline-in tehna hrang hrang chi li a chhawp chhuah zingah - chawlhkar khat chhunga khua/veng khata mihring 1,000 bi zela chhuta hri kai thar an tam dan azirin, 5 aia tlem chu green zone (hlauhawm lo), 5 atanga 10 chin orange zone (hlauhawm dan laihawl) leh 10 aia tam chu red zone (hlauhawm tak)-ah te thliar tur a ni a. Hri kai thar zat hi chawlhkar khat chhunga a leta a pun chuan red zone, ni 7 atanga ni 10 inkara a leta a pun chuan orange zone leh a leta pun nan ni 10 aia rei hun a duh chuan green zone-ah te thliar tur ni bawkin, hei bakah hian hri kai zat atanga thihpui an tam dan azir leh test zat atanga hri kai an tam dan azir te'n zone chi 3-ah hian thliar bawk tur a ni.

Vawiin thut khawmah hian health department official l-te, incident commander leh zonal officer te, DIPRO leh rapid response team member-te an tel a ni.