No.3902/2021-2022
Aizawl, 4th February, 2022 : Lunglei Forest Division buatsaihin VC-te leh YMA hruaitute tan kangmei ven chungang inzirtirna ‘Skill Development and Capacity Building On Fire Prevention’ chu vawiin khan Convention Centre Lungleiah neih a ni. Pu Kulothungan A, IAS DC Lunglei leh Chairman District Level Committee On Fire Prevention Lunglei ni bawk chuan trainig hi a hawng.

Hawnna inkhawm hi Pi Lalrammawii Sailo DFO Lungleiin kaihruaiin Pu Kulothungan A chuan kangmei ven kawnga Lunglei District-a mawhphurna sang tak chelhtu leh a hmatawnga che thin khawtlang hruaitute leh tlawmngai pawl te tana Forest Department in Skill Development and Capacity Building On Fire Prevention a buatsaih chu lawmawm a ti a. Khuarel chhiatna thleng thei te lo hmachhawn thei tura lo inven lawk chu Mizoram sawrkarin a ngai pawimawh hle a ni tiin kangmei ven kawnga training chu kalkhawmte leh District mipuiten an hlawkpui ngei a beisei thu a sawi. Kum hnih thum kalta chhung khan Lunglei District chu kangmei lakah harsatna tam tak kan tawka kumin ah chuan heng harsatna hi thleng lo tura kanlo inpuahchah lawk theuh a tul a ni, a ti a. Training naa mithiamte zirtirna te chu mahni veng chhung theuhah midangte zirtirna pe chhawng theuh turin a chah bawk a ni.

Dr Lalramzauva Director Christian Hospital Serkawn, pawhin thusawina neiin mahni awm hmuna ram leh khawtlang vei mai lova a taka thawktu nih theuh tum tur leh ram tih kan loh a pawimawh zia te, ramngaw neih hlut zia te hre thara venhim kawnga tan la theuh turin kalkhawmte a chah bawk a ni.

Vawiina Skill Developement and Capacity Building On Fire Prevention hawnna hunah hian Pi Carolyn LB Khiangte DLAO,Lunglei District chuan ‘Ram kang ven chungchanga Dan leh Hrai zirhona’ tih thupui hmangin zirtirna pe in, Pu C. Zairemthanga, Associate Professor & Head, Department of Economics Lunglei Gov’t. College chuan ‘Ram kang in a nghawng’ tih thupui hmangin zirtirna a pe a. Zawhna leh chhanna leh sawihona hun tha tak hman zui a ni.

Vawiin training-ah hian Lunglei Forest Division hnuaia veng tin VC leh YMA hruaitu/member pakhat theuh an tel a ni.