1668/2022-2023
Thlazing ni 20, 2022: Mizoram Khawpui Fai Intihsiakna 2022 leh Swachh Survekshan 2023 puala Lawngtlai khawpuia faina beihpui thlak tur chu tukin zingkar khan Lawngtlai Bazar Venga Areopagy hmunah a khuhhawnna hun hman a ni a. Lai Autonomous District Council (LADC)-a Sanitation changtu Executive Member Pu Lalropuia Chinzah chu Khuallian a ni.
Khuallian Pu Lalropuia Chinzah chuan Lawngtlai mipuite’n faina kawnga mahni zawna hma an lakna chu a lawmawm viau rualin, hmasawnna tur tam tak a la awm avangin inthlahdah lova ṭan lak chhunzawm zel a ṭul a ni, a ti a. LADC, District Administration leh UD&PA Department te ṭang tlangin Lawngtlai khawpui tana bawlhhlawh paihna leh thliar hranna tur ṭha tak a ruahman mek thu a sawi a. Fainain mimal leh khawtlang hmasawnna leh hriselna a keng tel tih sawiin, khawpui fai intihsiakna chu khua leh tui zawng zawng huap a ni tih hriaa mi dangte leh khawpui dangte tana entawn tlak khawpa inpho chhuah tum turin Lawngtlai mipuite chu a sawm a. Mizoram Khawpui Fai Intihsiaknaa inbuatsaih nana hman atan pawisa fai eng emaw zat chu LADC Sanitation Department ai awhin Sub-Committee kutah a hlan nghal a ni.
He hun hi Mizoram Cleanliness Competition 2022 Sub-Committee Chairman, Additional Deputy Commissioner Pu James Miahlung chuan a kaihruai a. MCC 2022 Sub-Committee Member Secretary, UD&PA-a District Project Officer Pi TT Beikhaizi chuan khawpui fai intihsiakna kalpui dan tur leh intihsiaknaa tehfung hrang hrang leh hun bi tuk te a sawi fiah a. Khawpui chhung hmun pawimawh leh lun laia hun tur bawlhhlawh bawm eng emaw zat chu a enkawltu tur association hrang hrang leh VC-te kutah hlan a ni bawk. He'ng bawlhhlawh bawmte hi Lawngtlai East Bialtu MLA Pu H. Biakzaua, LADC EM Pu Lalropuia Chinzah leh DRDA Project Director Pi Marilyn Rualzakhumthangi te'n an thawh a ni.
He hunah hian Government Lawngtlai College NSS, Government Region Higher Secondary School NSS leh Downtown English School Eco-Club te chuan faina leh thianghlimna kawnga inzirtirna thuziak (placard) chi hrang hrang an siam chu an tar chhuak a. Khuhhawnna hun hman zawh hian Areopagy aṭangin kawng dung then fai hnatlang an thawh chhunzawm nghal a ni.
Attachment
- Loading attachment...
